İlham Əliyev fransız liseyi ilə bağlı qanunu imzaladı

Bakı Fransız Liseyinin təməli 2011-ci ilin 7 oktyabrında Fransanın sabiq Prezidenti Nikola Sarkozinin Bakıya səfəri çərçivəsində qoyulub

Prezident İlham Əliyev “Azərbaycan Respublikası Hökuməti və Fransa Respublikası Hökuməti arasında Bakı Fransız Liseyinin yaradılması və fəaliyyəti haqqında” Sazişin təsdiq edilməsi barədə Azərbaycan Respublikasının Qanununu imzalayıb. 

“Azərbaycan Respublikası Hökuməti və Fransa Respublikası Hökuməti arasında Bakı Fransız Liseyinin yaradılması və fəaliyyəti haqqında” 2011-ci il oktyabrın 7-də Bakı şəhərində imzalanmış Saziş təsdiq edilib.

Qeyd edək ki, Bakı Fransız Liseyinin təməli 2011-ci ilin 7 oktyabrında Fransanın sabiq Prezidenti Nikola Sarkozinin Bakıya səfəri çərçivəsində imzalanan "Azərbaycan Respublikasının Hökuməti və Fransa Respublikasının Hökuməti arasında Bakı Fransız Liseyinin yaradılması haqqında" Sazişə əsasən qoyulub. 

Heydər Əliyev Fondunun təşəbbüsü ilə inşa olunacaq lisey ölkəmizdə müvəqqəti və daimi yaşayan fransızdilli əcnəbi vətəndaşların və Azərbaycan vətəndaşlarının bu dildə təhsil almalarına geniş imkanlar yaradacaq. Fransız məktəbinin tədris planı uşaq bağçasından başlayaraq 12 illik ümumi təhsil müəssisəsində tətbiq edilən klassik fransız tədris planı olacaq. Tədris proqramı Fransa milli təhsil sisteminin tələblərinə uyğun olaraq fransız dilində aparılacaq. Şagirdlərə veriləcək attestat Fransa Milli Təhsil Nazirliyinin standartlarına və tələblərinə cavab verəcək və nazirlik tərəfindən tanınacaq. Məktəbin məzunları öz seçimlərinə uyğun olaraq təhsillərini Fransanın istənilən ali təhsil müəssisəsində davam etdirmək imkanı qazanacaqlar. 

Bildirilib ki, bu təhsil ocağı Bakının “Ağ şəhər” adlanan ərazisində inşa olunacaq. Dünyada şəhərsalma sahəsində həyata keçirilən ən iri və nadir layihələrdən olan “Bakı Ağ şəhər” layihəsinin maraqlı tərəflərindən biri də burada Paris məhəlləsinin salınmasıdır. 

11 may 2014-cü ildə Azərbaycan Respublikasının Prezidenti İlham Əliyev, xanımı Mehriban Əliyeva və bu ölkədə rəsmi səfərdə olan Fransa Respublikasının Prezidenti Fransua Olland Bakı Fransız Liseyində aparılan tikinti işləri ilə tanış olublar.

Hazırda tikilməkdə olan liseyin binası 320 yerlik planlaşdırılıb. Bakının “Ağ şəhər” adlanan ərazisindəki Paris məhəlləsində inşa olunan bu təhsil müəssisəsinin 2014-cü ilin may ayının 11-nə kimi tikintisi üzrə işlərin mühüm hissəsi başa çatıb və qalan işlərin isə 2014-cü ilin sentyabrına qədər yekunlaşdırılması nəzərdə tutulub.

Fransız liseyində təhsilin Fransanın təhsil normalarına uyğun olaraq təşkil və təmin edilməsi Fransız Liseyinin tərəfdaşı kimi ictimai yararlığı tanınmış və qeyri-kommersiya təşkilatı olan Fransız Dünyəvi Təhsil Missiyası və Fransız Liseyinin təsisçisi olan qeyri-kommersiya hüquqi şəxsi arasında müvafiq müqavilə əsasında həyata keçiriləcək. 

Fransız liseyinin İdarəetmə Komitəsi Dövlət Neft Şirkətinin təyin etdiyi sədrdən, Təhsil Nazirliyinin təyin etdiyi sədr müavinindən, Heydər Əliyev Fondunun təyin etdiyi xəzinədardan və Fransanın Azərbaycandakı səfirin təyin etdiyi katibdən ibarətdir.

ANN.Az