Ceyhun Bayramov: "Ermənistan rəhbərləri danışıqları hər vəchlə uzatmağa çalışırdı"

"Əsas məsələ Azərbaycan torpaqlarının işğalına son qoymaq, ölkəmizin ərazi bütövlüyünü bərpa etməkdir. Ermənistan bu torpaqları işğal edib və onları qaytarmaqdan boyun qaçırır. Biz ATƏT-in himayəsində bu münaqişənin həlli üçün 1992-ci ildən, yəni 28 ildir danışıqlar aparırdıq, həmişə də bu formata sadiq olduğumuzu vurğulamışıq”.

Anews.az xəbər verir ki, bunu Azərbaycan Xarici İşlər naziri Ceyhun Bayramov Rusiyanın "Milli müdafiə” jurnalına müsahibəsində deyib.

"Əfsuslar olsun ki, indiyədək Ermənistan tərəfindən konstruktiv yanaşma əlamətləri görməmişik. Ermənistan BMT Təhlükəsizlik Şurasının qətnamələrini, ATƏT və s. təşkilatların sənədlərini rədd edib. Ermənistan danışıqları hər vasitə ilə uzadaraq danışıqlar masasında əvvəl əldə edilmiş razılaşmalardan imtina edib, eyni zamanda münaqişə bölgəsində mütəmadi təxribatlar törədib. Bütün bunlar sonsuza qədər davam edə bilməzdi”, - deyə nazir vurğulayıb.

Ermənistana qarşı hər hansı ərazi iddialarının olmadığını diqqətə çatdıran nazir daha sonra bildirib: "Biz sərhədləri pozmur, onlara qarşı hərbi əməliyyatlar aparmırıq. Azərbaycan silahlı qüvvələri yalnız Azərbaycan ərazisində, ölkəmizin beynəlxalq aləmdə tanınmış sərhədləri çərçivəsində fəaliyyət göstərir. Bizim fəaliyyətimiz BMT Nizamnaməsinin özünü müdafiə hüququnu təsbit edən 51-ci maddəsinə, beynəlxalq hüququn başqa təməl norma və prinsiplərinə söykənir.