XİN-in təsdiq etdiyi məsələyə YAP niyə etiraz edir? - AÇIQLAMA

Fransa prezidenti Fransua Olland və İsveçrə dövlət başçısı Didye Burkhalter ölkəmizə səfəri çərçivəsində Azərbaycan müxalifəti ilə də görüşdü. Lakin bir məqam da diqqətdən yayınmamalıdır. Hər iki ölkə rəhbəri Azərbaycana səfəri zamanı YAP nümayəndələri ilə görüşmədi. Düzdür, YAP sədri, dövlət başçısı İlham Əliyevlə onsuz da görüş olur. Amma o da bəllidir ki, bu görüş dövlət başçıları səviyyəsindədir.

YAP icra katibinin müavini, deputat Siyavuş Novruzov təmsil etdiyi partiya nümayəndələrinin müxalifətlə birgə xarici ölkə prezidentləri ilə görüşməməsi barədə sualları cavablandırıb.

YAP funksioneri Modern.az saytına açıqlamasında bildirib ki, ölkə prezidenti YAP sədri olduğundan və həmin dövlət başçıları ilə görüşdükdən sonra digər partiya rəsmilərinin görüşünə ehtiyac qalmır. YAP rəsmisi xarici ölkə rəhbərlərinin müxalifətlə görüşməsini də şərh edib. Onun sözlərinə görə belə görüşlər daha çox xarici ölkə başçıları müxalifətlə etika xətrinə görə görüşürlər. “Onların Azərbaycanın ictimai-siyasi həyatına təsir edə biləcək imkanları yoxdur. Bu baxımdan həmin dövlət başçılarının keçirdiyi görüşlər öz ölkələrinin imicini qorumaqdan ötrüdür. Onlar müxalifətlə və digər QHT nümayəndələri ilə görüşlə guya demokratik təsisatlarla təmasda olmaq təsəvvürü yaradırlar. Müxalifət isə bundan istifadə etməyə çalışır. Onlar bu vasitə ilə özlərinə tərəfdar yığmaq istəyirlər”.  

Bəs niyə görə həmin görüşləri Azərbaycan XİN təsdiqlədiyi halda, hakim partiya bu toplantılara etiraz edir. YAP təmsilçisi bu suala isə belə cavab verib: “Onlara görüş proqramı verilir və burada müəyyən məsələlər təyin olunur. Bu proqramlar həmin ölkələrin özlərinin sistemlərinə uyğun tərtib olunur”.