Bakıda AXCP üzləri aksiya keçirdi - Jurnalistlər də saxlanıldı
05.10.2021 21:57
Bakının Binə qəsəbəsində yerləşən 17 nömrəli cəzaçəkmə müəssisəsinin qarşısında bir qrup Azərbaycan Xalq Cəbhəsi partiyasının üzvləri partiya sədri Əli Kərimlinin mühafizəçisi Niyaməddin Əhmədovun həbsi ilə bağlı aksiya keçirməyə cəhd edib. Etirazçılar Əhmədovun həbsinin siyasi xarakter daşıdığını iddia edir və azadlığa buraxılmasını tələb ediblər, bu barədə Anews.az hadisə yerində olan müxbiri xəbər verir.
Partiya üzvlərinin iddiasına görə, Niyaməddin Əhmədov koronavirus infeksiyasına yoluxduğuna görə, Kürdəxanı həbsxanasından "Tubzon" kimi tanınan 17 nömrəli cəzaçəkmə müəssisəsinə keçirilir və orada fiziki işgəncələrə məruz qalb.
Niyaməddin Əhmədov 2020-ci il aprelin 16-da Xətai Rayon Məhkəməsinin qərarı ilə İnzibati Xətalar Məcəlləsinin 211-ci (karantin qaydalarını pozma) və 535-ci (polisin qanuni tələbinə tabe olmamaq) maddələri ilə inzibati qaydada 30 sutka müddətinə həbs olunub. Həmin ilin mayın 16-da inzibati həbs müddəti başa çatdıqdan sonra Niyaməddin Əhmədova qarşı Cinayət Məcəlləsinin 214-1-ci (terrorçuluğu maliyyələşdirmə) maddəsi ilə təqsirləndirilən şəxs qismində cəlb edilərək məhkəmənin qərarı ilə həbs-qətimkan tədbiri seçilib.
Bir neçə dəqiqə çəkən etiraz aksiyası polis əməkdaşları tərəfindən dağıdılıb. Əvvəlcə polislər güc tətbiq edərək aksiyaçıları post patrul maşınları ilə hadisə yerindən uzaqlaşdırıb. Daha sonra isə jurnalistlərə fiziki təzyiq edərək onların kamera və telefonlarını əllərindən alıblar. Jurnalistlərlə polislər arasında baş verən qarşıdurma zamanı müstəqil jurnalist Aysel Umudovanın eynəyi sındırılıb, Mikroskop media müxbiri Zərifə Novruzovanı isə polislər sürüyərək xidməti maşına mindirilib.
4 jurnalist olmaqla, ümumilikdə 10-dan çox iştirakçı polislər tərəfindən ərazidən uzaqlaşdırılıb. Post patrul xidməti maşınında jurnalistin "niyə jurnalistlər də bölməyə aparılır" sualına polis əməkdaşlarından biri bu barədə onlara xüsusi göstəriş verildiyini bildirib.
Xəzər rayonu 3-cü polis idarəsinə aparılan aksiyaçıların bəziləri və jurnalistlər daha sonra sərbəst buraxılıb. Aksiyaçılardan Zəfər Əhmədov, Fuad Əhmədli, Fərid Nağıbəyli və Rəvan Babayev hələ də bölmədə saxlanılır.
Samirə Əli
www.anews.az
Youtube
Bizi Youtube-da izləyin
Oxşar xəbərlər
Oxşar xəbərlər
Siyasət 19:41
Ərdoğan Əliyevi Ankarada keçiriləcək Türk Dövlətləri Təşkilatının zirvə görüşünə dəvət edib
Foto
Video
