“Qarabağın işğaldan sonra investisiya potensialı” adlı videokonfrans keçirilib

11.11.2021 12:49

Azərbaycanın Xarkovdakı Fəxri Konsulluğunun təşəbbüsü və təşkilatçılığı ilə Zəfər Günü ilə bağlı "Qarabağın işğaldan sonra investisiya potensialı” mövzusunda onlayn rejimdə regional videokonfrans keçirilib.

Anews.az xəbər verir ki, videokonfransa Azərbaycan və Ukrayna Parlamentlərarası əlaqələr üzrə Deputat Qrupunun həmsədrləri, hər iki ölkənin dövlət strukturlarının rəsmiləri, Xarkov Vilayət Administrasiyasının rəsmiləri, Xarkov şəhər Şurasının deputatları, iş adamları, politoloqlar qatılıblar.

Konfransın məqsədi Ukrayna iş adamlarının Azərbaycanın işğaldan azad olunan ərazilərində investisiya potensialını dəyərləndirmək və onları Qarabağ bölgəsi ilə tanış etməkdir.

Qarabağ bölgəsinin investisiya potensialına dair videosüjetə baxandan sonra Azərbaycanın iqtisadiyyat nazirinin müavini Niyazi Səfərov, Azərbaycan və Ukrayna Parlamentlərarası əlaqələr üzrə Deputat Qrupunun həmsədri Rüfət Quliyev ölkəmizin işğaldan azad olunan ərazilərində görülən yenidənqurma və bərpa işləri barədə ətraflı məlumat veriblər. Xarici sərmayəçilərin Qarabağ bölgəsinə yatırımı üçün əlverişli mühitin yaradıldığını vurğulayıblar.

Politoloq Tofiq Abbasov isə çıxışında Qarabağın regionda yaranmış yeni siyasi vəziyyət və əhalinin həyat təhlükəsizliyinin səviyyəsindən danışıb. Sonra aqrar sahədə mövcud potensial mövzusunu Azərbaycan Kənd Təsərrüfatı Nazirliyi yanında Aqrar Tədqiqatlar Mərkəzinin direktor müavini Namiq Şalbuzov və Aqrar İnnovasiya Mərkəzinin direktor müavini Anar Cəfərov izah ediblər.

Azərbaycan və Ukrayna Parlamentlərarası əlaqələr üzrə Deputat Qrupunun həmsədri, Ali Radanın deputatı Vladimir Kreydenko Azərbaycan xalqını Böyük Qələbə Günü münasibətilə təbrik edib və ümidvar olduğunu bildirib ki, bu tədbir ukraynalı iş adamlarının Qarabağa investisiya yatırımı üçün öz töhfəsini verəcək.

Azərbaycanın Xarkov şəhərindəki fəxri konsulu Əfqan Salmanov iclasda iştirak edənlərin diqqətinə çatdırıb ki, Ukrayna-Azərbaycan əlaqələrinin iqtisadi sahədə dərinləşdirilməsi məqsədilə növbəti addım olaraq ukraynalı iş adamlarının dekabr ayında Azərbaycana birbaşa səfər olacaq və hazırda Ukrayna nümayəndə heyətinin tərkibi formalaşdırılır.

Bundan sonra Əfqan Salmanov videokonfransın bütün iştirakçılarını hər iki tərəfdən Azərbaycan xalqının qarşıdan gələn 44 günlük Vətən müharibəsində Zəfər Günü münasibətilə təbrik edib. "Azərbaycanın Ali Baş Komandanı və Prezidenti İlham Əliyevin müdrikliyi və uzaqgörənliyi sayəsində ölkənin ərazi bütövlüyü bərpa edilib. Bu, XXI əsrin ən böyük Qələbəsidir!”, - deyə Əfqan Salmanov əlavə edib.

Tədbirdə daha sonra çıxış edən Xarkov Vilayət Administrasiyasının rəsmiləri, Xarkov şəhər Şurasının deputatları, müəssisə rəhbərləri mövzu ətrafında öz fikirlərini bölüşüblər.