Saxlanılan erməni hərbçilərin sayı açıqlandı

Ermənistanın atəşkəsi pozması ilə başlayan döyüşlərdə Azərbaycan Ordusu tərəfindən 6 erməni hərbçi saxlanılıb.

 

Məlumatı Ermənistanın "Hraparak” nəşri  təsdiqləyib.

 

Ermənistan silahlı qüvvələrinin bölmələri Azərbaycan dövlət sərhədinin Kəlbəcər və Laçın rayonları sahəsində ölkəmizə qarşı genişmiqyaslı təxribat törədib.
Azərbaycan Müdafiə Nazirliyinin məlumatına görə, qarşı tərəf Azərbaycan Ordusunun mövqelərini müxtəlif çaplı atıcı silahlar və qumbaraatanlardan intensiv atəşə tutaraq döyüş postlarımıza atəşlə zərər vurub. Nəticədə ilkin məlumata görə, Azərbaycan Ordusunun iki hərbi qulluqçusu yaralanıb.

Müdafiə Nazirliyi daha sonra açıqlama yayaraq sərhəddə vəziyyətin gərgin olaraq qaldığını, hazırda döyüş əməliyyatlarının davam etdiyini bildirib.

 

Ermənistan tərəfinin törətdiyi təxribata cavab olaraq qarşı tərəfə məxsus tank əleyhinə qurğu və minaatan məhv edilib.

Erməni mediası da hadisə ilə bağlı məlumatlar yayır. "Haykakan jamanak” nəşri bildirir ki, Zəngəzurda Çiçernakar dağında Ermənistan və Azərbaycan qoşunları arasında atışma gedir.

Nəşrin məlumatına görə, atışma Ermənistan ərazisində yerləşən iki mövqe üzərində nəzarət uğrunda aparılır. 

Mənbənin sözlərinə görə, atışma Azərbaycanın erməni birləşmələrinin yüksəklikdə yerləşən mövqelərini tərk etmələrini tələb etməsindən sonra başlayıb. Ermənistan tərəfi isə buna etiraz edib.