Tanınmış saksafonçusu işğal olunmuş ərazilərimizdə konsert verdi

Tanınmış italyan saksafonçusu Federiko Mondelçi ötən gün Azərbaycanın işğal altındakı Xankəndi şəhərində konsert proqramı ilə çıxış edib. ANN.Az Modern.az-a istinadən xəbər verir ki, Xankəndi “Gənclər sarayı”nda baş tutan konsert proqramında italyan saksafonçu Corc Qerşvin və “The Beatles” qrupunun repertuarından mahnılar ifa edib. Dünyanın aparıcı saksafonçularından biri kimi tanınan Mondelçi İtaliyada Rossini adına konservatoriyanı, daha sonra isə Fransada Bordo konservatoriyasını bitirib. Məşhur La Skala (Milan) filarmonik orkestrinin tərkibində dünya turnesində çıxış edib. 1990-cı ildən isə dirijor kimi həm müasir, həm də klassik musiqiləri ifa edib. Xatırladaq ki, bir sıra avropalı, o cümlədən italiyalı musiqiçilər Dağlıq Qarabağa qanunsuz səfərlər etdikləri üçün Azərbaycan Xarici İşlər Nazirliyinin “qara siyahı”sına daxil ediliblər. Ehtimal olunur ki, F.Mondelçi də “persona non qrata” elan ediləcək.ANN.Az