Türkiyə və Ermənistan arasında danışıqlarının 3-cü raundu keçirilib

"Danışıqları aparan xüsusi nümayəndələr danışıqlar yolu ilə öz ölkələri arasında münasibətlərin tam normallaşmasına nail olmaq məqsədini bir daha təsdiqləyiblər", - nazirliyin bəyanatında deyilir.

"Səmimi və məhsuldar  fikir mübadiləsi, həmçinin bu istiqamətdə nəzərəçarpacaq irəliləyişə nail olmaq üçün atıla biləcək mümkün addımların müzakirəsi aparılıb”, - bəyanatda deyilir.

Bəyanatda həmçinin əlavə edilib ki, iki ölkə prosesi ilkin şərt olmadan davam etdirmək barədə razılığa gəlib.

Türkiyəni danışıqlarda bu ölkənin ABŞ-dakı keçmiş səfiri Serdar Kılıcı, Ermənistanı isə vitse-spiker Ruben Rubinyan təmsil edir. 

Danışıqların birinci raundu yanvarın 14-də Rusiyanın paytaxtı Moskvada, ikincisi isə fevralın 24-də Vyanada baş tutub.

Fevralda tərəflər Türkiyənin ən böyük şəhəri İstanbul ilə Ermənistanın paytaxtı İrəvan arasında çarter reyslərini bərpa ediblər.

Türkiyənin xarici işlər naziri Mövlud Çavuşoğlu və erməni həmkarı Ararat Mirzoyan martın 12-də Türkiyənin cənub-qərbindəki kurort şəhəri Antalyada görüşərək münasibətlərin normallaşmasına davam etməyə hazır olduqlarını bildiriblər.

İki ölkə arasında münasibətlər 1993-cü ildə Ermənistanın Azərbaycan ərazisini işğal edəndən sonra dayandırılıb. Türkiyə Azərbaycana dəstək olaraq Ermənistanla sərhədi bağlayıb. 

Türkiyə və Ermənistan 2008-2009-cu illərdə ABŞ və İsveçrənin vasitəçiliyi ilə münasibətləri bərpa etmək üçün ciddi cəhdlər etsə də, heç bir irəliləyiş əldə olunmayıb.