Ermənistan “Qarabağın statusu” mövzusunu unutmalıdır - Əliyev

"Şifahi razılıq var idi ki, "Qarabağın statusu” ilə bağlı məsələ qaldırılmayacaq. Amma təəssüflər olsun ki, biz Ermənistan hökumətindən qondarma "Dağlıq Qarabağ”ın "statusu” ilə bağlı bəyanatlar eşidirik. Bu da tamamilə əks anlayışlardır.  "Dağlıq Qarabağ” yoxdur. 1991-ci ilin sonunda Azərbaycan parlamentinin qərarı ilə Dağlıq Qarabağ Muxtar Vilayəti ləğv edilib. Ərazimizdə belə bir inzibati struktur yoxdur. Ona görə də statusun hər hansı qeyd edilməsi yalnız yeni problemlərə gətirib çıxaracaq. Ermənistan hökuməti bunu anlamalı və tarixi yenidən yazmaq cəhdindən çəkinməlidir”, - Əliyev deyib. 

Onun sözlərinə görə, Ermənistan Azərbaycanın ərazi bütövlüyünü şübhə altına alırsa, bununla da Bakını öz ərazisi ilə bağlı oxşar addımlar atmağa məcbur edir.

"Əgər Ermənistan ərazi bütövlüyümüzü şübhə altına almaqda davam edərsə, Azərbaycanın Ermənistanın ərazi bütövlüyünü şübhə altına almaqdan başqa yolu qalmayacaq. Üstəlik, tarixi nöqteyi-nəzərdən Azərbaycanın buna daha çox hüququ var”, - deyə Əliyev bildirib.

Onun sözlərinə görə, 1920-ci ilin noyabrında, Azərbaycanın sovetləşməsindən altı ay sonra sovet hökuməti "ölkəmizin tarixi hissəsini - Zəngəzuru əlindən alaraq Ermənistana birləşdirdi”.

Əliyev əlavə edib ki, "Ermənistan hökuməti İkinci Qarabağ müharibəsindən yaxşı dərs almalı və Azərbaycana qarşı istənilən ərazi iddialarından əl çəkməlidir”.

Prezident eyni zamanda vurğulayıb ki, Azərbaycan öz Konstitusiyası çərçivəsində Qarabağda yaşayan erməni əhalinin hüquqlarını və təhlükəsizliyini təmin edəcək.

 

"Diqqətinizi çəkmək istədiyim daha bir məsələ Azərbaycanda yaşayan ermənilərlə bağlıdır. İnanıram ki, Avropa İttifaqı Şurasının prezidenti Şarl Mişelin Brüsseldə keçirilən üçtərəfli görüşün yekunları üzrə elan etdiyi bəyanatda Qarabağdakı erməni əhalisinin hüquq və təhlükəsizliyinin də nəzərə alınacağı açıq şəkildə əks olunub. Və biz bunu tam dəstəkləyirik. Konstitusiyamız Azərbaycanda bütün insanların hüquq və təhlükəsizliyini təmin edir. Azərbaycan çoxmillətli ölkədir və erməni əhalisi ən böyük milli azlıq deyil. Konstitusiyamız bütün millətlərin nümayəndələrinə, o cümlədən uzun illər Azərbaycanda yaşayan ermənilərə bərabər hüquqlar verir”, - Əliyev deyib.