ABŞ-ın Qafqaz üzrə xüsusi nümayəndəsi Bakıya gəlir

ATƏT-in Minsk qrupunun amerikalı yeni həmsədri, ABŞ-ın Qafqaz üzrə danışıqlarda xüsusi nümayəndəsi, səfir Filip Riker bu həftə Cənubi Qafqaz ölkələrinə səfər edəcək.

Bu barədə Dövlət Departamentinin mətbuat xidmətinin rəhbərinin müavini Vedant Patel bildirib.

Dövlət Departamentinin nümayəndəsi xatırladıb ki, bu, Rikerin həmsədr statusunda Cənubi Qafqaza ilk səfəridir. Patel bölgəyə səfərlərin müntəzəm olacağına ümid etdiyini deyib.

"Səfər çərçivəsində Riker Ermənistan, Gürcüstan və Azərbaycana səfər edəcək. O, bu üç ölkənin yüksək rütbəli rəsmiləri ilə görüşlər keçirərək, regiondakı əsas problemləri, habelə münaqişənin konstruktiv həlli üçün yardım və birbaşa iştirak imkanlarını, mübahisəli məsələləri və regional əməkdaşlığı müzakirə edəcək”, - Patel vurğulayıb.

Bundan əvvəl ATƏT-in Minsk qrupunun amerikalı həmsədri vəzifəsini Endryu Şofer tutub.

Qarabağ nizamlanması üzrə ATƏT-in Minsk qrupunun üç həmsədr ölkəsi Rusiya, Fransa və ABŞ-dır. Ermənistan tərəfi dəfələrlə ATƏT-in Minsk qrupunun həmsədrliyi çərçivəsində Qarabağ üzrə sülh prosesinin bərpa olunmasının tərəfdarı olub. Lakin rəsmi Bakı Qarabağ münaqişəsinin bitdiyini və ATƏT-in Minsk qrupunun fəaliyyətinə daha ehtiyac duyulmadığını bəyan edib.

Rusiyanın xarici işlər naziri Sergey Lavrov da son açıqlamalarında ATƏT-in Minsk qrupu formatında əməkdaşlığa əhəmiyyət vermədiklərini bildirib.

www.anews.az