Azərbaycan Prezidenti - Artıq iki gündür ki, atəşkəs rejiminə əməl olunur

Dövlət başçısı Azərbaycan-Ermənistan sərhədindəki eskalasiya ilə bağlı çevik reaksiya verdiyinə görə Rusiya liderinə minnətdarlığını ifadə edib.

"Döyüşlər 8 saatdan az davam edib. Ermənistan tərəfi atəşkəs barədə razılığı dərhal yerinə yetirməsə də, artıq 2 gündür ki, atəşkəs rejiminə əməl olunur. Bu, onu göstərir ki, nə Azərbaycanın, nə də Ermənistanın genişmiqyaslı eskalasiya niyyəti olmayıb. Təəssüf ki, sərhəd münaqişələri olur. Hər iki tərəfdən çoxsaylı itkilər var", - İlham Əliyev qeyd edib.

 

Dövlət başçısı əmin edib ki, Azərbaycan İkinci Qarabağ müharibəsindən sonra imzalanan üçtərəfli bəyanatın öhdəliklərinə sadiqdir.

"Hazırda əsas məsələ iki dövlət arasında münasibətlərin normallaşma prosesini dağıtmamaq, bu istiqamətdə irəliləyişə nail olmaqdır. Rusiya tərəfi də bu prosesə öz töhfəsini verir. Həmçinin baş nazir müavinləri səviyyəsində danışıqlar aparılır", - Prezident vurğulayıb.

 

Rusiya Prezidenti Vladimir Putin Səmərqənddə Şanxay Əməkdaşlıq Təşkilatının (ŞƏT) sammiti çərçivəsində Azərbaycan Prezidenti İlham Əliyevlə görüşündə deyib ki, iki ölkə arasında əməkdaşlıq müxtəlif nazirliklər, idarələr və parlamentlər vasitəsilə davam edir.

 

Putin Azərbaycan-Ermənistan sərhədindəki gərginliyə də toxunub.

 "Azərbaycanla Ermənistan arasında son sərhəd insidentinin Qarabağa heç bir aidiyyəti yoxdur. Bu, tamamilə başqa regionda, Azərbaycanla-Ermənistan sərhədində baş verib. Həqiqətən də biz baş verənlərdən və itkilərdən təəssüflənirik. Hər şeydən öncə, Rusiyanın təsiri ilə münaqişəni lokallaşdırmağa nail olunub. Ümid edirəm ki, bundan sonra da belə olacaq”, - o deyib

Sentyabrın 16-da Səmərqənddə Azərbaycan Respublikasının Prezidenti İlham Əliyevin Rusiya Federasiyasının Prezidenti Vladimir Putin ilə görüşü olub.