Ermənistan və Azərbaycan baş nazirlərinin görüşündən GÖZLƏNTİLƏR

Sıyasi ekspert Elxan Şahinoğlu Brüssel görüşünü şərh edərkən bildirib ki, adətən bu cür görüşlər öncəsi xarici işlər nazirləri görüşüb fikir mübadiləsi aparır, liderlərin görüşü üçün zəmin hazırlayırlar. Bu il ərzində Brüselldə liderlərin dörd görüşü baş tutub, növbəti görüş də bu ay baş tutacaq. 

Ekspert hesab edir ki, bu həm Azərbaycan, həm də Ermənistan üçün faydalıdır.

"Rusiyadakı mərkəzlərdən fərqli olaraq, Avropa İttifaqı, Brüssel  münaqişədə maraqlı deyil və Azərbaycanla  Ermənistan arasında məsələlərin həllini, əməkdaşlıq və regional layihələrin işə düşməsini istəyir. Bu Azərbaycan və Ermənistanın da maraqlarına uyğundur”, - Şahinoğlu bildirib. 

Elxan Şahinoğlu deyir ki, görüşlər sülh prosesinin sürətləndirilməsi və ya sülh imzalanması anlamına gəlmir. Lakin görüşlərin keçirilməsi, ümumilikdə, bu sahədə müsbət gedişatdan xəbər verir. 

Exspertin fikrincə,  Soçi görüşlərində ciddi nəticə əldə olunmaması Rusiyanın vasitəçiliyinin işə yaramadığını göstərir.  Əksinə, Rusiyadakı mərkəzlər Qarabağdakı seperatçılara dəstəyi artırır. 

Siyasi şərhçi hesab edir ki, Avropa ittifaqının məsələyə fərqli yanaşması - Avropa İttifaqının rəhbəri Şarl Mişelin açıqlamalarında  Minsk qrupu ifadəsi işlətməməsi kimi məsələlərə görə dialoqun davam etməsi hər iki tərəf üçün faydalı olacaq.