Aclıq aksiyasının 8-ci günündə Bəxtiyar Hacıyevin vəziyyəti pisləşib

"Bəxtiyar Hacıyev  dedi ki, bu gün onun təzyiqi 90/60, hərarəti 35,4, nəbzi 76-ya düşüb. Gün ərzində daha yarım kilo arıqlayıb, çəkisi 79,5 kq olub. Beləliklə, o, artıq 5 kq arıqlayıb. Zəiflikdən bəzən tarazlığını itirir və yıxılmamaq üçün özünü saxlayır. Lakin o, azadlığa çıxana qədər aclıq aksiyasını davam etdirəcək”, - vəkil bildirib.

Onun sözlərinə görə, bir gün əvvəl Bəxtiyar Hacıyev istintaq təcridxanasının sanitar qovşağına köçürülüb.

Vəkil onu da bildirib ki, dekabrın 23-də Bakı Apellyasiya Məhkəməsində fəalın ev dustaqlığına buraxılması ilə bağlı şikayətinə baxılacaq.

"Biz apellyasiya məhkəməsindən həbs-qətimkan tədbirinin dəyişdirilməsini gözləyirik", - Cavadov bildirib.

 

Onun sözlərinə görə, Hacıyevə qarşı irəli sürülən ittihamlarla  o həbs edilməməli idi.  Söhbət ictimai təhlükə yaratmayan cinayətlərdən gedir. Hacıyevi 1,5 ilə qədər həbs gözləyir. Qanuna əsasən, təqsirləndirilən şəxsə 3 ildən artıq həbs cəzası nəzərdə tutulursa şəxsin həbs edilməməsimə icazə verilir. Ümid edirik ki, məhkəmə həbs qərarını ləğv edəcək”, - vəkil bildirib.

Bəxtiyar Hacıyev dekabrın 9-da xuliqanlıq və məhkəməyə hörmətsizlik ittihamı ilə saxlanılıb. Həmin gün Xətai Rayon Məhkəməsi onun barəsində 1 ay 20 sgün müddətinə  həbs qərarı çıxarıb. Müdafiə tərəfi bu qərardan apellyasiya şikayəti verib, Hacıyevin özü isə məhkəmənin şikayəti təmin etmədiyi təqdirdə müddətsiz aclıq aksiyasına başlayacağını vəd edib.

Dekabrın 15-də Apellyasiya Məhkəməsi Hacıyevin şikayətini təmin etməyib.