Azərbaycanda əsgər intiharlarında günahkar komandirlərdir - DEPUTAT

Müdafiə Nazirliyinin N saylı hərbi hissəsinin hərbi qulluqçusu, əsgər Vüsal Məmmədov  2023-cü il yanvarın 9- da odlu silahdan atəş açmaqla özünü öldürüb.
 
Bu, 2023-cü ildə ilk əsgər intiharı hadisəsidir. Ötən il hərbi xidmətdə 20-dən çox əsgər intihar edib.  
 
Hərbi ekspert Üzeyir Cəfərovun fikrincə,  əsgər intiharları müxtəlif səbəblərdən baş verə bilər. Bura şəxsi problemləri, hərbi xidmətdə olduğu zaman əsgər yoldaşları və komandirləri ilə hər hansı problem yaşama, ailə məsələləri və digər ehtimallar daxildir.
 
 
Ekspert bildirib ki, nazirlik, hərbi hissələrin komandirlərinə belə hallarla bağlı mütəmadi əmrlər verilir, lakin bunlar formal xarakter daşıyır, icra olunmur.
 
"Əmrlərdə verilən tapşırıqlara əsasən, hər bir əsgərlə fərdi danışıqlar aparılmalı, onun problemləri ilə maraqlanmalı, arzu və istəkləri dinlənilməlidir. Bu cür hallarda əsas məsuliyyət komandirlərin üzərinə düşür”, - Cəfərov deyib.
  
Deputat Aqil Abbas hesab edir ki, əsgər intiharlarında əsas günah komandirlərin payına düşür.
 
"Əsgərlərlə sərt rəftar onların intiharına yol aça bilər. Və yaxud Laçında, digər sərt hava şərait olan ərazilərdə hərbi xidmətə dözə bilməyən əsgərlər olur ki, belə halda da intihar edə bilərlər. Komandirlər onların yerini tez zamanda dəyişməlidir”, - deputat deyib.
 
Aqil Abbas bildirib ki, hüquq-mühafizə orqanları belə məsələləri dəqiq araşdırmır, o səbəbdən də, məsələnin həlli mexanizmi dəqiq hazırlana bilmir.  
 
"Əsgər intiharlarına görə, kiminsə cəzalandırılmasına hələ ki, rast gəlməmişəm”, - deputat deyib.
 

www.anews.az