Aİ-nin göndərdiyi missiya öhdəlikləri yerinə yetirməməyə bəhanə olmamalıdır- SƏFİR

Avropa İttifaqının Ermənistana missiya vasitəsilə qoşulması Ermənistanın öhdəliklərini yerinə yetirməkdən yayınması üçün bəhanə olmamalıdır. Bunu Azərbaycanın Fransadakı səfiri Leyla Abdullayeva öz tvitter hesabında bildirib.
 
"Bu məsələdən sərhədlərin delimitasiyası prosesi də daxil olmaqla, Azərbaycan və Ermənistan arasında normallaşma prosesini pozmaq üçün istifadə edilməməlidir”, - o bildirib.
 
Avropa İttifaqı Şurası Ümumi Təhlükəsizlik və Müdafiə Siyasəti (CSDP) çərçivəsində Ermənistanda Aİ-nin mülki missiyasının (EUMA) yaradılmasına razılıq verib.
 
Missiyanın məqsədinin Ermənistanın sərhədyanı rayonlarında sabitliyi təşviq etmək, yerlərdə inam yaratmaq və Aİ-nin dəstəyi ilə Ermənistan və Azərbaycan arasında münasibətlərin normallaşdırılması səyləri üçün əlverişli mühit yaratmaq olduğu bildirilir.
 
EUMA-nın ilkin mandatı iki il olacaq və onun əməliyyat qərargahı Ermənistanda yerləşəcək. Mülki Əməliyyatlar Komandanı EEAS-ın mülki planlaşdırma və icra üzrə idarəedici direktoru Stefano Tomat olacaq.
 
Azərbaycan Xarici İşlər Nazirliyi məsələ ilə bağlı bildirib ki, Avropa İttifaqı missiyasının mövcudluğunun hazırkı dialoq mexanizmlərinə qarşı sui-istifadəsinin təhlükəlidir və bundan çəkinilməlidir. 
 
 
 

www.anews.az