AYİB qaz qiymətləri və inflyasiya ilə bağlı artım proqnozunu aşağı salıb

Avropa Yenidənqurma və İnkişaf Bankı (AYİB) yüksək təbii qaz qiymətləri və davam edən inflyasiya təzyiqləri fonunda proqramlarının olduğu ölkələr üçün 2023-cü ildə artım proqnozunu 2,1%-ə endirib. Bu barədə bankın regionda iqtisadiyyatın vəziyyəti ilə bağlı cümə axşamı dərc olunmuş hesabatında deyilir.

2022-ci ilin sentyabrında yayılan əvvəlki proqnoz cari ildə iqtisadi artımı 3% proqnozlaşdırırdı. Bununla yanaşı, 2022-ci il üçün region ölkələrində ÜDM artımının təxminləri demək olar ki, dəyişməz qalıb - 2,4% artım, keçən ilin sentyabrında gözləniləndən 0,1 faiz çoxdur, 2024-cü il üçün artım proqnozu isə 3,3% təşkil edib.

"Region ölkələrinin yarıdan çoxunda artım proqnozlarına yenidən baxılıb və proqnozlarda faktiki olaraq artım müşahidə edilməyib. 2024-cü ildə artımın 3,3%-ə qədər sürətlənəcəyi gözlənilir ki, bu da ümumi olaraq orta müddətli təxminlərə uyğundur”, - hesabatda deyilir.

AYİB proqramı regionunda orta inflyasiya 2022-ci ilin oktyabrında 17,5%-ə çatdıqdan sonra ötən ilin dekabrında 16,5%-ə düşüb ki, bu da 1998-ci ildən bəri ən yüksək səviyyədir.

AYİB-in baş iqtisadçısı Beata Javorczyk inflyasiyanı mənfi amil adlandırıb. Bununla bağlı o, bəzi analitiklərin "son illərin böhranlarından, xüsusən də Ukraynadakı münaqişədən sonra bərpa və artım səviyyəsinə dair optimizmini” "əsassız” adlandırıb.


Vəziyyəti region və ölkələr üzrə nəzərdən keçirsək, o zaman Mərkəzi Asiya dövlətlərində (Qazaxıstan, Qırğızıstan, Monqolustan, Tacikistan, Türkmənistan və Özbəkistan) orta artım templəri 2023-cü ildə 4,9% təşkil edəcək ki, bu da gözləniləndən 0,1 faiz bəndi yüksəkdir. 2024-cü il üçün artım proqnozu daha parlaqdır - 5,4%.

Bank Mərkəzi Avropa və Baltikyanı ölkələrdə (Macarıstan, Latviya, Litva, Polşa, Slovakiya, Sloveniya, Xorvatiya, Çexiya və Estoniya) ÜDM-in 4% artdıqdan sonra 2023-cü ildə 0,6% yavaşlayacağını proqnozlaşdırır.  Cari illə əlaqədar olaraq, proqnozun 0,7% azalmasından söhbət gedir, 2024-cü ildə artım 2,7% səviyyəsində gözlənilir.

Şərqi Avropa və Qafqaz ölkələrinin (Azərbaycan, Ermənistan, Belarus, Gürcüstan, Moldova və Ukrayna) ÜDM-in ötən il 17,6% azaldıqdan sonra 1,6% artacağı gözlənilir. 2024-cü ildə bank 3,2% artım proqnozlaşdırır.



www.anews.az