Bəziləri "Tərtər işi"ndən çirkin məqsədləri üçün istifadə edir - Kamran Əliyev

 

"Bu işi gündəmdə saxlamaqla, bir növ özlərini gündəmdə saxlamağa cəhd edirlər. Bu yolverilməzdir. Hesab edirəm ki, insanların hissləri ilə manipulyasiya etmək özü bir mənəviyyatsızlıqdır”, - Kamran Əliyev bildirib. 

 

Fevralın 3-də "Tərtər işi”ndə həlak olanların yaxınları yenidən bu işdə kobud və kütləvi qanun pozuntuları ilə bağlı məsələ qaldırıb və kütləvi işgəncələrə icazə verənlərin, əsassız hökm çıxaranların hələ də cəzalandırılmamasından narazılıqlarını bildiriblər. 

 

Valideynlər Prezident İlham Əliyevi Tərtər işi ilə bağlı ittihamlara yenidən baxmağa çağırıblar.

 

Millət vəkili Zahid Oruc ötən ilin dekabrında Milli Məclisin plenar iclaslarının birində "Tərtər işi" ilə bağlı açıqlama verərək bildirib ki, hərbi prokurorluq ləğv edilməli və keçmiş baş prokuror da xalqdan üzr istəməlidir. Deputatın bu çıxışına bir necə həmkarı da dəstək olmuşdu.

2016-cı ilin aprel döyüşlərindən sonra bir qrup hərbçi dövlətə xəyanətdə ittiham olunub.

Baş Prokurorluq, Dövlət Təhlükəsizliyi Xidməti, Müdafiə Nazirliyi və Daxili İşlər nazirliklərinin birgə bəyanatında hərbçilərin Ermənistanın xeyrinə casusluq etdiyi bildirilir.

Lakin 2019-cu ildə 2017-ci ilin may-iyun aylarında saxlanılan 100-dən çox əsgər və zabitin işgəncələrə məruz qaldığı məlum olub.

25 hərbçi uzun müddətə azadlıqdan məhrum edilib, daha 9 nəfər işgəncə nəticəsində həlak olub.

Daha sonra təqsirləndirilənlərdən bəziləri bəraət alıb, işgəncələrə görə məsuliyyət daşıyanlar həbs edilib. Qanunsuz məhkum olunmuşların bəraət alması prosesi davam edir. Ötən il oktyabrın 5-də məhkəmələr 16, dekabrın 6-da isə daha 19 nəfərə bəraət hökmü çıxarıb.

 

Gülnar Nazimqızı