Şolz Ermənistanla Azərbaycan arasında fikir ayrılıqlarının aradan qaldırılmasına çağırıb

Almaniya Ermənistanla Azərbaycan sərhədindəki vəziyyətdən narahatdır və İrəvanla Bakı arasında fikir ayrılıqlarının aradan qaldırılmasının tərəfdarıdır. Bunu cümə axşamı Almaniya kansleri Olaf Şolz Ermənistanın baş naziri Nikol Paşinyanla danışıqlardan sonra keçirilən mətbuat konfransında deyib.

"Ermənistan və Azərbaycanın uzunmüddətli münaqişəsini tədricən həll edə bilməsi vacibdir. Baş nazir mənə mövcud vəziyyət barədə danışdı. Biz Ermənistanla Azərbaycan arasında sərhəddə qeyri-sabit və  getdikcə artan vəziyyətlə bağlı narahatıq”, - o bildirib.

Onun sözlərinə görə, mövcud vəziyyət "yerli sakinlərin xeyrinə tez bir zamanda məqbul həll yoluna endirilməlidir”. "Bizim nöqteyi-nəzərimizdən indi Ermənistan və Azərbaycanın ərazi bütövlüyü və suverenliyi,  Qarabağ əhalisinin öz müqəddəratını təyinetmə hüququ prinsipləri əsasında sülh yolu ilə həllinə nail olmaq vacibdir. Bütün bu aspektlər eyni dərəcədə vacibdir. ", - Scholz bildirib.

Almaniya Nazirlər Kabinetinin rəhbəri Azərbaycanla vəziyyətin nizamlanmasına töhfə verməli olan Aİ-nin Ermənistandakı mülki missiyasının (EUMA) işini də dəstəkləyib. Onun sözlərinə görə, bu, Avropanın regionda sülhə "mühüm töhfəsidir”

Fevralın 22-də Beynəlxalq Məhkəmə qərar verib ki, Azərbaycan Laçın dəhlizi ilə insanların, nəqliyyat vasitələrinin və yüklərin sərbəst hərəkətini təmin etmək üçün bütün tədbirləri görməlidir.
 
Fevralın 18-də Azərbaycan prezidenti İlham Əliyev Münhen görüşündə panel çıxışı zamanı bir daha vurulayıb ki, Laçın dəhlizi humanitar yardımların və sadə vətəndaşların giriş-çıxışı üçün açıqdır. 
 
Dekabrın 12-dən başlayaraq bir qrup azərbaycanlı ekoloq Rusiya sülhməramlılarının nəzarəti altında olan ərazidə faydalı qazıntı yataqlarının qanunsuz istismarı əleyhinə etiraz aksiyası keçirir. Həmin müddətdə Qarabağın erməni əhalisi  də azərbaycanlı ekoloqlara cavab olaraq  iki etiraz aksiyası təşkil ediblər.  Onların aksiya keçirməsinin əsas səbəbi Laçın dəhlizinin bağlı olması, əhalinin ərzaq, yanacaq və digər ehtiyaclardan məhrum edilməsi göstərilib.   
 
Bu müddətdə bir sıra beynəlxalq təşkilatlar Azərbaycanı yolu açmağa çağırıb. 
 
Azərbaycan hökuməti "Laçın dəhlizi”nin Rusiya sülhməramlı qüvvələrinin nəzarəti altında olduğunu vurğulayaraq, Ermənistanın iddialarını təkzib edib.
 
Rəsmi Bakı bildirib ki, Rusiya sülhməramlılarının nəzarətindəki ərazidə keçirilən aksiya siyasi deyil, ekoloji məqsəd daşıyır və Azərbaycan tərəfi həmin ərazilərdə yaşayan erməni əhalisinə istənilən dəstəyi göstərməyə hazırdır. 
 

www.anews.az