Quterreş - Qadınların hüquqları təhlükə altındadır

Qadınların hüquqları təhlükə altındadır. Bunu BMT-nin baş katibi Antonio Quterreş BMT-nin mənzil-qərargahında komissiya iclasında çıxışı zamanı deyib. 

"Əfqanıstanda qadınlar və qızlar ictimai həyatdan kənarlaşdırılıb. Bir çox yerlərdə qadınların cinsi və reproduktiv hüquqları pozulur. Bəzi ölkələrdə qızların məktəbə gedərkən qaçırılma və hücuma məruz qalma riski var”, - deyə BMT rəhbəri bildirib.


BMT Qadınlarına görə, gender bərabərliyi uğrunda mübarizə indiki templə davam edərsə, kişi və qadın bərabərliyinə yalnız 300 ildən sonra nail olunacaq.


"Ana ölümü artır. Hər iki dəqiqədə bir qadın hamiləlik və ya doğuş zamanı ölür; bu ölümlərin əksəriyyətinin qarşısı alına biləndir. BMT bütün dünyada qadınları və qızları dəstəkləyir”, - baş katib söyləyib.

Quterreş həmçinin COVID-19 pandemiyasından təsirlənən milyonlarla qadın və qızı - ödənişli işi tərk etməyə məcbur edilən anaları, erkən nikaha girməli olan yetkinlik yaşına çatmayan qızlardan da danışıb.

BMT rəhbəri gender bərabərliyinə nail olmaq üçün  3 təklif verib.

"Birincisi, xüsusilə Qlobal Cənub ölkələrində qadınlar üçün təhsil, məşğulluq və əmək haqqı sahəsində yeni imkanlar yaratmaq lazımdır. İkincisi, ölkələrin liderləri qadınların elm və texnoloji inkişafda iştirakını dəstəkləməli və təşviq etməlidirlər. Üçüncü, biz qadınlar və qızlar üçün təhlükəsiz rəqəmsal məkan yaratmalıyıq”, - baş katib vurğulayıb.




www.anews.az