Azərbaycan Avropaya qaz ixracını iki dəfə artırır - Əliyev

Azərbaycan artan tələbat səbəbindən enerji resurslarının Avropaya ixracı üçün qaz kəmərlərinin tutumunu iki dəfə artırmağı planlaşdırır. Bunu Azərbaycan prezidenti İlham Əliyev çərşənbə axşamı Berlində alman iş adamları ilə görüşündə deyib. 

"Avropada yeni mənbələrdən təbii qaza tələbat artır. Bu baxımdan biz TANAP və TAP boru kəmərlərinin ötürücülük qabiliyyətini iki dəfə - müvafiq olaraq 16 milyard kubmetrdən 32 milyard kubmetrə və 10 milyard kubmetrdən 20 milyard kubmetrə çatdırmağı gözləyirik", - prezident bildirib.

Onun sözlərinə görə, Ukraynada hərbi əməliyyatlar başlayandan sonra 10-dan çox Avropa ölkəsi qaz nəqlinə başlamaq və ya artırmaq xahişi ilə Bakıya üz tutub. "Bizim tədarüklərin coğrafiyası artıq kifayət qədər müxtəlifdir. Biz tərəfdaşlarımızın ehtiyaclarını ödəmək üçün hər şeyi edirik", - Əliyev əlavə edib.


www.anews.az