Azərbaycanda "Vahid Ümmət" təşkilatı nəyə xidmət edəcək? - AÇIQLAMA

 

Siyasi məsələlər üzrə ekspert Əziz Əlibəylinin sözlərinə görə, bu təşkilatın əsas məqsədlərindən biri ölkədəki bütün ruhanilərin adından çıxış etməkdir.

"Təşkilat Şeyx Bəxtiyar Bayramovun rəhbərlik etdiyi bir ququmdur. Bu qurum "həqiqi dinin meyarları", "İsrail getməlidir" ideyalarının ətrafında birləşib. Həmçinin bu təşkilat "Azərbaynda Kərimə Dövləti" qurmaq ideyasınıda özündə birləşdirir. Təşkilatın hədəfə aldığı nöqtələr içərisində Azərbaycanın təhlükəsizlik orqanları da var", - Əziz Əlibəyli deyib.

Bakı ilə Tehran arasında münasibətlər bu ilin yanvarında Azərbaycanın İrandakı səfirliyinə silahlı basqın nəticəsində diplomatik missiyanın mühafizə rəisinin həlak olması və onun iki həmkarının yaralanmasından sonra xüsusilə gərginləşib.

 

Hadisədən sonra Azərbaycan səfirliyi diplomatik fəaliyyətini dayandırıb, əməkdaşları və onların ailə üzvləri Azərbaycana təxliyə edilib. Rəsmi Bakı Tehranın son vaxtlar Azərbaycanla sərhəddə təşkil etdiyi irimiqyaslı hərbi təlimləri də qeyri-dost addım kimi qiymətləndirir.

 

Bundan əlavə, Bakı martın sonunda Azərbaycan parlamentinin deputatı Fazil Mustafanın həyatına sui-qəsddə İranın əli olduğunu açıqlayıb.
 
Son aylar ərzində Azərbaycanın hüquq-mühafizə orqanları ölkədə İranın xeyrinə casusluq və təxribat fəaliyyətində ittiham olunan şəxslərin saxlanılması istiqamətində bir sıra əməliyyatlar həyata keçirib. Aprelin 6-da İranın Bakıdakı səfirliyinin 4 əməkdaşı persona non-qrata elan edilib, onlara 48 saat ərzində Azərbaycanı tərk etmək əmri verilib. 

 

Azərbaycanın dövlət qurumları hələlik "Vahid Ümmət"  təşkilatının yaradılması barədə xəbərə münasibət bildirməyib. 
 
Eltac Nurullazadə