Krım Ukraynanın ayrılmaz hissəsidir – BƏYANAT

Yeni Nəfəs Hərəkatı Ukrayna ətrafında baş verən hadisələrlə bağlı bəyanat yayıb. ANN.Az-a daxil olan həmin bəyanatı təqdim edirik.Azərbaycan öz müstəqilliyini əldə edən gündən onun yanında olan Ukrayna dövlətində baş verən son hadisələr üzücü və qəbulolunmazdır. Ukrayna dövləti və yerli əhali həmişə ölkəsində yaşayan hər hansı millətə qarşı ayrı-seçkilik siyasətindən uzaq olmuş və demokratik inkişaf yolunda uğurla addımlamışdır. Dövlətin ayrılmaz hissəsi olan Krımın ondan qoparılması siyasəti XXI əsrdə dünyada yeni münqaşə ocağının alovlanmasına yol açası bir addımdır ki, dünya birliyi bunun qarşısının alınması üçün hər şeyi etməlidir.Nəzərə almaq lazımdır ki, dünyada monomillətli dövlət demək olar ki, mövcud deyildir. İnsan hüquq və azadlıqlarının yüksək səviyyədə qorunduğu bir ölkəyə hər hansı bir toplumun müdafiəsi adı altında müdaxilə qətiyyən yolverilməzdir. Həmin müdaxilənin adı XXI əsrdə işğal siyasəti kimi dəyərləndirilir ki, bu da digər dövlətlər üçün mənfi nümunədir. Rusların müdafiəsi adı altında baş verən müdaxiləyə uyğun olaraq, tatarların müdafiəsi adı altında başqa dövlətin müdaxiləsi baş verərsə, proseslərin dünya müharibəsinə qədər sürüklənməyəcəyinə kimsə zəmanət verə bilməz. Buna görə, ilk növbədə Rusiya öz yanlış addımından çəkinməli, Ukraynanın ərazi bütövlüyünə hörmətlə yanaşmalıdır.Yeni Nəfəs Hərəkatı Ukrayna dövlətinin ərazi bütövlüyünü tanıyır, Krımın onun tərkib hissəsi olduğunu və qan qardaşlarımız olan Krım tatarlarının yanında sona kimi olacağını bəyan edir.  Dünya dövlətlərini Ukrayna dövlətinin ərazi bütövlüyünə təhlükə yaradacaq bütün addımlardan çəkinməyə çağırır.Yeni Nəfəs Hərəkatı14.03.2014