Bəxtiyar Hacıyeva yeni ittihamlar təqdim oluna bilər

"İstintaq xüsusilə, 44 günlük müharibə zamanı Bəxtiyar Hacıyevin Azərbaycan Silahlı Qüvvələrinin əsgərlərinə göstərdiyi yardımın mahiyyətini təhrif etməyə çalışır. Belə ki, Bəxtiyarı yığılan yardımların bir hissəsini mənimsəməkdə ittiham etməyə cəhdlər edilir. Bəxtiyar Hacıyev bu cür iddiaları qətiyyətlə pisləyir. Toplanan yardımın maliyyə mənbələri və cəbhəyə çatdırılması tamamilə şəffaf idi. Belə yardımın göstərilməsi Dövlət Təhlükəsizliyi Xidmətinin və Daxili İşlər Nazirliyinin rəhbərləri ilə razılaşdırılıb. Günlərin birində Bəxtiyar Hacıyev vəkilləri vasitəsilə açıqlama verəcək”, -  Rüfət Səfərov bildirib.

Bəxtiyar Hacıyev 2022-ci il dekabrın 9-da xuliqanlıq və məhkəməyə hörmətsizlik ittihamı əsasında həbs edilib. Hacıyev dekabrın 15-də azadlığa buraxılması tələbi ilə aclıq aksiyasına başlayıb və ictimaiyyət nümayəndələrinin təkidli müraciətlərindən sonra dekabrın 28-də aclığı dayandırıb. Yanvarın 9-da Bakı Apellyasiya Məhkəməsi onun azadlığa buraxılması ilə bağlı vəsatətini təmin etmədiyindən o,  aclıq aksiyasını bərpa edib. Hacıyev aclıq aksiyasının 51-ci günündə dayandırılıb.

İstintaq orqanı bu il iyunun 16-da Bəxtiyar Hacıyevə Cinayət Məcəlləsinin 192-ci (Qanunsuz sahibkarlıq), 193-cü (Yalançı sahibkarlıq), 320.1-ci (Lisenziyadan və ya hüquq verən və ya öhdəlikdən azad edən digər rəsmi sənəddən istifadə etmək məqsədi ilə) maddələri ilə ittiham irəli sürüb.

Yeni ittihamlar Bəxtiyar Hacıyevin qrant alması və təyinatı üzrə xərcləməməsi ilə bağlıdır.

ABŞ Dövlət Departamentinin, ABŞ Helsinki Komissiyasının, Avropa İttifaqının, Avropa Şurasının və bir sıra beynəlxalq QHT-lərin nümayəndələri Bəxtiyar Hacıyevin həbsdən azad edilməsini tələb edən bəyanatlar yayıb.