Hikmət Hacıyev Qarabağa gedən hər iki yolun açıq olduğunu təsdiqlədi

 

"Ağdam-Əsgəran-Xankəndi yolu açıq və işləkdir və belə də olmalıdır! Azərbaycanın prinsipial, ədalətli, qanuni, dönməz mövqeyidir! "Maskalar cırılır, reallıq qalır"! Azərbaycanda boz zonalara yer yoxdur", - Hacıyev "X" sosial hesabında yazıb. 

 

Sentyabrın 18-də Beynəlxalq Qızıl Xaç Komitəsi (BQXK) Laçın dəhlizi və Ağdam yolu ilə ehtiyacı olan şəxslər üçün buğda unu və tibbi ləvazimatların çatdırılmasını həyata keçirdiyini açıqlayıb.

 

Sentyabrın 12-də Rusiya Qızıl Xaç Cəmiyyəti tərəfindən ərzaq və qeyri-ərzaq məhsulları ilə dolu yük maşını  Ağdam rayonundan keçərək  Ağdam-Əskəran yolu ilə Xankəndinə çatdırılıb. 

 

Bundan əvvəl Xarici İşlər Nazirliyinin sözçüsü Ayxan Hacızadə mətbuata açıqlamasında bildirmişdi ki, Azərbaycan hər iki yoldan (red- Laçın və Ağdam yolu) Beynəlxalq Qızıl Xaç Komitəsinin vasitəsilə eyni zamanda istifadəsinə razılıb verib.

 

Azərbaycan tərəfi dəfələrlə Ağdamdan gedən magistral yol boyu rayonun erməni əhalisinin lazım olan hər şeylə təmin olunmasına hazır olduğunu bəyan edib. Artıq iki həftədən çoxdur ki, orada Azərbaycan Qızıl Aypara Cəmiyyətinin humanitar yardımı kimi 40 ton un olan iki yük maşını saxlanılırdı. 
 
Separatçı erməni dəstələri humanitar yardımın Ağdam-Xankəndi yolu ilə Xankəndinə getməsinə maneə törədirdi.
 
Ağdam-Əsgəran yolu 1988-ci ildən bağlıdır. Bu son 30 ildə bu yolla göndərilən ilk humanitar yükdür.