Sülh sənədi 20 maddədən az olan bir sənəddir - Prezident

Sülh sənədi 20 maddədən az olan kiçik bir sənəddir. Bunu Prezident İlham Əliyev deyib. 
 
"Sülh sənədi 6-7 səhifədən ibarət olan və 20 maddədən az olan bir sənəddir. Ermənistan bizim şərhlərimizə cavab vermək üçün 70 günə yaxın vaxt istəmişdi. İndiyə kimi sülh müqaviləsi ilə bağlı Ermənistanla 5-6 dəfə fikir mübadiləsi aparılıb", - Prezident əlavə edib. 
 
Prezident vurğulayıb ki, Azərbaycan tərəfi sülh sənədi ilə bağlı son şərhini sentyabrın 11-də Ermənistana göndərib. 
 
Dekabrın 4-də Ermənistan xarici işlər nazirinin müavini Mnatsakan Səfəryan Milli Assambleyada jurnalistlərin suallarına cavab verərək deyib ki, Azərbaycan Ermənistanın sülh müqaviləsinin altıncı variantı ilə bağlı təkliflərinə cavab verməyib.
 
Noyabrın 30-da Azərbaycan və Ermənistanın baş nazirlərinin müavinləri sərhədlərin delimitasiya ilə bağlı görüşüb. Görüşdə Azərbaycan və Ermənistan baş nazirlərinin müavinləri delimitasiya komissiyalarının iclaslarının intensivləşdirilməsi barədə razılığa gəliblər. 

Noyabrın 16-da Ermənistanın baş naziri Nikol Paşinyan mətbuata açıqlamasında Azərbaycanla sülh sənədi üzrə əsas prinsiplər razılaşdırıldığını bildirib.
 
Oktyabrın 14-də Prezident Administrasiyasının Xarici siyasət məsələləri şöbəsinin müdiri Hikmət Hacıyev "X" sosial hesabında Ermənistan sülh sazişi ilə bağlı sənədin variantını iki aydan artıqdır ki gecikdirdiyini yazıb.
 
Oktyabrın 26-da Nikol Paşinyan mətbuata açıqlamasında yaxın aylarda Ermənistanla Azərbaycan arasında sülh müqaviləsinin imzalana biləcəyini deyib.
 
2020-ci ilin noyabrında Azərbaycanla Ermənistan arasında hərbi əməliyyatlar üçtərəfli bəyanata əsasən dayandırılıb. Bundan sonra Azərbaycan və Ermənistanın rəhbər şəxsləri sülh imzalanması istiqamətində bir neçə görüşlər həyata keçirib. 

Gülnar 

www.anews.az