ABŞ yüzlərlə Rusiya vətəndaşına və bir Azərbaycan vətəndaşına qarşı sanksiyalar tətbiq edib

Onların arasında Rusiya müxalifətinin lideri Aleksey Navalnının ölümündə rolu olanlar da var.

Prezident Bayden öz bəyanatında sonuncu sanksiyaları Vladimir Putinin "ölüm və məhvetmə" addımlarına cavab adlandırıb.

Sonuncu paket Rusiyanın maliyyə sektoruna, müdafiə sənayesinə sanksiyalardan yayınmaqda kömək edən yüzlərlə şəxsə yönəlmiş ikinci dərəcəli sanksiyaları ehtiva edir.

Azərbaycan vətəndaşı Mehdi Qafarzadə də onlar arasındadır. ABŞ-ın məlumatına görə, Qafarzadə Qırğızıstanda yerləşən, ABŞ-ın sanksiyalarını pozaraq, Rusiyaya təyyarə komponentləri və aviasiya ehtiyat hissələri göndərən Ukon şirkətinin baş direktorudur.

ABŞ həmçinin Rusiyaya məhsul tədarükünün qarşısını alan 100-ə yaxın yeni ixrac məhdudiyyəti tətbiq edir, ixracçılara nəticələr barədə xəbərdarlıq edir.

Bu arada, bayden cümə günü öz bəyanatında Amerika konqresinin üzvlərini Ukraynaya 60 milyard dollar ölçüsündə maliyyə yardımı göstərilməsi haqqında qərarı nəhayət qəbul etməyə çağırıb. Bu vəsaitin böyük hissəsi ABŞ-da silah istehsal edilməsinə və bu silahların Ukraynaya göndərilməsinə ayrılacaq.

www.anews.az