Anar Məmmədlinin bel ağrıları kəskinləşib - vəkil

1 saylı Bakı İstintaq Təcridxanasında saxlanılan Seçkilərin Monitorinqi və Demokratiyanın Tədrisi Mərkəzinin (SETMM) rəhbəri Anar Məmmədlinin belində yaranan ağrılar kəskinləşib. Bunu onun vəkili Elmar Süleymanov müdafuə etdiyi şəxslə görüşdən sonra bildirib. 

"Mən bu barədə (istintaq təcridxanasının) rəhbərliyi ilə danışmışam. Mənə dedilər ki, Anar Məmmədli ortopedik döşəklə təmin olunacaq”, - vəkil bildirib.


Məmmədlinin işi ilə bağlı istintaqın gedişinə gəlincə isə  Süleymanovı qeyd edib ki, "istintaq hərəkətləri ləng olsa da davam etdirilir”. 

Məmmədlinin ailə üzvləri onun onurğa yırtığından əziyyət çəkdiyini və ortopedik döşəyə ehtiyaclı olduğunu bildirib . Lakin istintaq təcridxanasının rəhbərliyi  ona bu döşəyi verməyə icazə verməyib. 

Anar Məmmədli aprelin 30-da bir qrup şəxs tərəfindən qabaqcadan əlbir olaraq qaçaqmalçılıqda (Azərbaycan Respublikası Cinayət Məcəlləsinin 206.3.2-ci maddəsi) ittiham olunaraq həbs edilib. Əvvəlcə ona "Abzas Media işi” ilə əlaqəli ittiham təqdim edilib.  Daha sonra onun işi ayrıca icraata ayrılıb.

Çoxsaylı beynəlxalq təşkilatlar və ABŞ Dövlət Departamenti Azərbaycan hökumətini Anar Məmmədlini və həbsdə olan digər jurnalist və fəalları dərhal azad etməyə çağırıb.


www.anews.az