Ermənistan əhalisini "total kasıblıq" gözləyir - Zaxarova

"Erməni məhsulları daha yüksək gömrük rüsumları ilə üzləşəcək və bu, ÜDM-in artım tempinin kəskin enməsinə gətirib çıxaracaq. Məncə, bu, əsas məqamdır, çünki söhbət təkcə bu günün gəlirindən və qazancından yox, ümumilikdə inkişafdan gedir. Əgər biz istehsal miqyasını və Ermənistan əhalisini nəzərə alsaq, bu, sadəcə olaraq, total kasıblığa səbəb ola bilər", –  Zaxarova bildirib.

Rusiya XİN rəsmisi həmçinin Ermənistan məhsullarının ixracının 80% azalacağını proqnozlaşdırıb. Onun fikrincə, Ermənistanın Avrasiya İqtisadi İttifaqı (Aİİ) ölkələri ilə ticarət dövriyyəsini alternativ mənbələrlə əvəzləmək hətta orta müddətli perspektivdə belə mümkün deyil.

Onun sözlərinə görə, Ermənistanın rəsmi statistikasına əsasən, 2015-ci ildən etibarən ölkənin ixracı 10 dəfə artıb və bunun əsas səbəbi Rusiya bazarıdır.

 

Keçən il Ermənistanın Rusiya ilə ticarət dövriyyəsi 12 milyard dollara yaxınlaşıb.

Zaxarova vurğulayıb ki, Ermənistanın xarici siyasətini müstəqil şəkildə müəyyən etmək hüququ var və bu, suveren dövlətin hüququdur. Lakin o, Ermənistan hakimiyyətini bu qərarların nəticələrini daha praqmatik şəkildə dəyərləndirməyə və siyasi müzakirələrdə "qara və ağ" yanaşmadan çəkinməyə çağırıb.

"Erməni məhsulları Avropada və ABŞ-da heç kəsi maraqlandırmır. Əgər maraqlandırsaydı, çoxdan alardılar, elə deyilmi? Əsas problem nədədir? Əgər bu qədər kömək etmək istəyirlərsə və bu mallar əvəzedilməzdirsə, niyə onları indidən almırlar?", –  Rusiya XİN rəsmisi sual edib.