İsrailin İrana hücum etməsini istəyirlər -Pəzeşkiyan ABŞ-ı ittiham edir

ABŞ İsraili İrana qarşı hərbi təcavüzə təhrik edir. Bu barədə İran İslam Respublikasının prezidenti Məsud Pəzeşkiyan bəyan edib.

"ABŞ prezidenti bildirib ki, İranın raketləri və [nüvə] silahı olmamalıdır. Onlar sionist rejimin İrana hücum etməsini istəyirlər – eynilə Qəzza zolağında olduğu kimi – və biz bu [hücuma] qarşı səssiz qalaq”, – TASS Pəzeşkiyanın sözlərini sitat gətirib.

"Amerika İranı bütün imkanlardan məhrum etməyə çalışır, başqalarına onunla danışıqlar aparmağı qadağan edir, lakin sonra özü danışıqlara hazır olduğunu bəyan edir. Düşmənlər İranda ixtilaf yaratmağa və ölkədə sabitliyi pozmağa çalışırlar", – deyə İran prezidenti vurğulayıb.

Fevralın 4-də Donald Tramp ABŞ-ın İrana qarşı “maksimal təzyiq” siyasətini bərpa etmək haqqında fərman imzalayıb. Bu fərman, xüsusilə, Vaşinqtonun İran neftinin ixracını məhdudlaşdırmaq səylərini artırmasını nəzərdə tutur.

Eyni zamanda, Tramp Pəzeşkiyanla görüşə açıq olduğunu bildirib və Tehranla “əla bir razılaşma” bağlamaq istədiyini deyib. Fevralın 10-da isə o, İranın nüvə silahı əldə etməsinin yalnız iki yolla – “bombalarla” və ya razılaşma imzalamaqla dayandırıla biləcəyini bəyan edib. Tramp İranla razılaşma əldə etmək istədiyini, lakin bunun üçün “bombardmana” əl atmaq istəmədiyini əlavə edib.