Almaniyanın prezidenti ilk dəfə xanımı ilə Azərbaycana gəlir- Gözləntilər

Almaniya Prezidenti Frank-Valter Ştaynmayer və həyat yoldaşı Elke Büdenbender martın 30-dan aprelin 2-dək ilk dəfə Azərbaycana və Ermənistana rəsmi səfər edəcək. 

Bildirilir ki, prezident Azərbaycana səfəri çərçivəsində prezident İlham Əliyevlə görüşəcək. O, YUNESKO-nun Ümumdünya İrs Siyahısına daxil edilmiş Bakının tarixi mərkəzinə baş çəkəcək , xristian, müsəlman və yəhudi ruhaniləri ilə tolerantlıq və dinlərarası anlaşma mövzusunda müzakirələr aparacaq. O, həmçinin Azərbaycanda qadınların vəziyyəti ilə bağlı müzakirələrdə iştirak edəcək.

Almaniya prezidentinin Ermənistanda da prezident və baş nazirlə görüşü gözlənilir. 

Politoloq Aytən Qurbanova bildirir ki, Almaniya Avropada və Azərbaycanda əməkdaşlıq üzrə kifayət qədər yüksək əlaqələri olan ölkələrdən biridir.

"Bu günə qədər də Azərbaycan və Ermənistan arasında baş verən münasibətlərdə Almaniya müəyyən bir vasitəçi rolunda olub. Amma görünən odur ki, son dövrlərdə sülh müqaviləsinin imzalanması ilə bağlı təkcə Almaniya deyil, digər ölkələrdə maraqlıdır. Biz eyni zamanda ABŞ və digər ölkə nümayəndələrinin də münasibətini görürürük. Gözləntilər Almaniya tərəfindən də eyni təşəbbüslərin səsləndirilməsi Azərbaycan və Ermınistan arasında sülh müqaviləsinin bağlanması istiqamətində tərəflər arasındakı müzakirəyə maraqlı olduğunu şərh etməyə icazə verir. Gəlişin hansı nəticələri olacaq və Ermənistana hansı təsir mexanizmi olacaq bu gələcək dövrdə müzakirə olunacaq məsələlərdən biridir. Amma bu gün ki dövrdə sülhə töhfə verəcək bütün tərəflərin hər hansı bir təşəbbüsləri müsbət hal kimi  qiymətləndirilir",- politoloq bildirib.

Aytac Zeynalova