"Toplum TV" işi üzrə təqsirləndirilən şəxslərin hazırlıq prosesi keçirilib

Bakı Ağır Cinayətlər Məhkəməsində hakim Azər Tağıyevin sədrliyi ilə keçirilən "Toplum Tv" işi üzrə  təqsirləndirilən Akif Qurbanov, Ələsgər Məmmədli, Ruslan İzzətli, Ramil Babayev, Əli Zeynalov, Müşfiq Cabbarov, İlkin Əmrahov, Fərid İsmayılov və Elmir Abbasovun cinayət işi üzrə hazırlıq prosesi keçirilib. 

Məhkəmədə ittiham olunan şəxslər özlərini təqsirli bilməyiblər. 

Ələsgər Məmmədlinin vəkili Fəxrəddin Manafov bildirib ki, Ələsgər bəyin  xəstəliyi nəzərə alınaraq, ev dustaqlığına buraxılmalıdır.

"Ələsgər bəyin vəziyyəti göz önündədir. Təhlillər aparılıb. Şiş getdikcə böyüyür. Bir tədbir görülməlidir",- vəkil vurğulayıb.

Məhkəmədə digər təqsirləndirilən şəxslərin vəkilləri də onların ev dustaqlığına buraxılması ilə bağlı vəsatət təqdim edib.

Ramil Babayevin və İlkin Əmrahovun vəkili Günay İsmayılovun sözlərinə görə, hər iki təqsirləndirilən şəxslərin təhsilləri yarımçıq qalıb.

"Ən azından təhsil hüquqları pozulmasın. Bu səbəbdən də ev dustaqlığı tələb etdik. Amma təssüf ki, təmin olunmadı. Ev dustaqlığı ilə bağlı yenidən vəsatət verəcəyik. Ümid edirik ki, həmin vaxta bir dəyişiklik əldə olunar. Təcrübədən görünür ki, nəticə dəyişmir. Amma hər an hər şey dəyişə bilər.  Qanun buna imkan verir. Ən azınan xəstəliyi olan Ələsgər bəyin ev dustaqlığı təmin olunmalıdır",- Günay  İsmayılov bildirib.

Məhkəmədə təqsirləndirilən  Akif Qurbanovun yeni qoşulan vəkili Fuad Ağayev cinayət işi materialları ilə tanış olmaq üçün məhkəmədən vaxt istəyib.  Bu səbəbdəndə məhkəmənin hazırlıq iclası aprelin 24-dək təxirə  salınıb.

Ötən il martın 6-da "Toplum TV" internet televiziyasının yerləşdiyi ofisdə və daha bir neçə ünvanda Daxili İşlər Nazirliyi tərəfindən əməliyyat keçirilib.

"Toplum TV"nin həmtəsisçiləri Akif Qurbanov, Ələsgər Əhmədoğlu (Məmmədli), əməkdaşları və III Respublika Platformasının qurucu üzvü Ruslan İzzətli barəsində həbs qətimkan tədbiri seçilib. Onlara qarşı Cinayət Məcəlləsinin 206.3.2 (qaçaqmalçılıq qabaqcadan əlbir olan bir qrup şəxs tərəfindən törədildikdə) maddəsi ilə cinayət işi açılıb.

Daha sonra iş üzrə təqsirləndirilən şəxslərə qarşı əlavə olaraq ittihamlar (Cinayət Məcəlləsinin 162-1.1, 192.3.2, 193-1.3.1, 193-1.3.2, 206.4, 213.2.1 maddələri ilə) irəli sürülüb.

Aytac Zeynalova