ABŞ Azərbaycana sülh müqaviləsi və enerji sahəsində tərəfdaşlığını alqışlayıb

ABŞ prezidenti Donald Tramp Azərbaycanın Ermənistanla sülh müqaviləsinin mətnini yekunlaşdırmasını alqışlayır. Bu barədə ABŞ Dövlət Departamentinin Enerji Resursları İdarəsinin baş məsləhətçisi Erik Ceykobs bildirib. 

“Prezident Donald Tramp bu sənədin imzalanmasını və ratifikasiya olunmasını səbirsizliklə gözləyir. Regionda uzunmüddətli iqtisadi inkişafı təmin etmək üçün sabitlik və rəsmi sülh razılaşması həlledici əhəmiyyət daşıyır. Dayanıqlı sülh münaqişə dövranını qıracaq və Cənubi Qafqazda təhlükəsizlik və rifahın yeni dövrünü başlayacaq. Bu cəsarətli addımı ataraq sülh və tərəqqiyə doğru irəlilədiyiniz üçün sizə təşəkkür edirik”, – Ceykobs bildirib. 

Onun sözlərinə görə, Cənub Qaz Dəhlizi ABŞ tərəfindən “yenilik, ambisiya və əməkdaşlığın parlaq nailiyyəti” kimi dəyərləndirilib. 

“Layihənin Azərbaycan üçün geniş enerji resurslarını reallaşdırmaq imkanı yaratdığı və bunun yalnız ölkə əhalisinə deyil, regionun digər dövlətlərinə də fayda verir. Azərbaycan artıq bir neçə onlarla ölkəyə etibarlı enerji təchizatçısına çevrilib”,- ABŞ rəsmisi deyib. 

“Amerika Birləşmiş Ştatları kimi, Azərbaycan da əhəmiyyətli enerji resurslarına malikdir. Prezident Tramp enerjini ABŞ-ın üstünlüyünün təməli və milli təhlükəsizliyin açarı kimi xarakterizə edib. Bu sərvətdən iqtisadi imkanlar yaratmaq, səhiyyə və təhsili yaxşılaşdırmaq, vətəndaşların həyat səviyyəsini yüksəltmək üçün istifadə etmək məsuliyyətli idarəçiliyin göstəricisidir”, – o əlavə edib. 

ABŞ rəsmisi həmçinin Hyustonda keçirilən CERAWeek tədbirində iştirak etdiyini və bu forumun təbii qazın qlobal enerji gündəmində əsas mövqeyə qayıtdığını açıq göstərdiyini bildirib. 

 “Təbii qaz artıq qeyri-müəyyən enerji gələcəyinə keçid vasitəsi kimi deyil, etibarlı, əlçatan və təhlükəsiz enerji mənbəyi kimi qəbul olunur. Bu, uzun illər boyu enerji tələbatını qarşılamaq üçün əsas seçim olacaq”, - o deyib. 

Bir neçə gün öncə Səngəçal ixrac terminalına etdiyi səfəri xatırladan rəsmi, Azərbaycanın təbii qazı ölkənin və Avropanın enerji təhlükəsizliyinin gələcəyi üçün əsas amil kimi dəyərləndirməyə davam etdiyini vurğulayıb.

“Xəzər dənizinə baxan bu möhtəşəm məkan – dünyanın əsas enerji mərkəzlərindən biri – bir daha göstərir ki, Azərbaycan təkcə enerji təminatçısı deyil, həm də Mərkəzi Asiya ilə Avropa arasında körpü rolunu oynayır”, – o bildirib.

Prezident Tramp isə enerji bolluğunu Amerikanın rifahının əsası hesab edir. ABŞ qlobal enerji potensialının açılması, eləcə də hər bir ölkənin öz resurslarından istifadə edərək inkişaf etməsi və çiçəklənməsi hüququnu dəstəkləmək üçün tərəfdaşlarla əməkdaşlığa sadiqdir.

N.Təbrizli