Sahibə Qafarova MDB PA-nın iclasında çıxış edib

Milli Məclisin sədri Sahibə Qafarova Rusiyaya işgüzar səfəri çərçivəsində aprelin 18-də Müstəqil Dövlətlər Birliyinə (MDB) üzv dövlətlərin Parlamentlərarası Assambleyasının 1941-1945-ci illərdə faşizm üzərində Qələbənin 80 illiyinə həsr olunmuş təntənəli iclasında çıxış edib.

Azərbaycanın faşizm üzərində tarixi Qələbədə böyük rolunu qeyd edən Sahibə Qafarova diqqətə çatdırıb ki, cəbhəyə 600 mindən artıq oğul və qızını göndərmişdi.Onlardan 300 mindən çoxu döyüşlərdə həlak olub. Bu müharibədə göstərdikləri igidliyə görə 130-dan çox azərbaycanlı Sovet İttifaqı Qəhrəmanı adına layiq görülüb. 170 mindən çox əsgər və zabit müxtəlif orden və medallarla təltif olunub.

Qafarova bu tarixi Qələbədə Azərbaycan neftinin böyük rolundan danışaraq bildirib ki, müharibə illərində Sovet İttifaqında hasil edilən neftin dörddə üçü, aviasiya benzininin və yüksək keyfiyyətli motor yağlarının isə 85-90 faizi Azərbaycanın payına düşürdü.

Spiker qeyd edib ki, Azərbaycanda İkinci Dünya müharibəsi veteranlarına diqqət və qayğı bu gün də Prezident İlham Əliyevin rəhbərliyi ilə həyata keçirilən dövlət siyasətinin prioritet istiqamətlərindən biri olaraq qalır. Bu istiqamətdə Prezident tərəfindən imzalanmış çoxsaylı sərəncamlar – müharibə veteranlarına göstərilən qayğının artırılması və onların sosial müdafiəsinin gücləndirilməsi bunun bariz sübutudur.