Azərbaycanla enerji və sülh əməkdaşlığı dərinləşir - Kallas

Aİ və Azərbaycan arasında yeni tərəfdaşlıq və əməkdaşlıq sazişi üzrə danışıqların yenidən başlanmasına razılıq verilib. Bu barədə Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallas  Bakıda keçirilən mətbuat konfransında bildirib. 

Onun sözlərinə görə, Azərbaycan regionda Aİ üçün mühüm tərəfdaşdır, xüsusilə enerji sahəsində əməkdaşlıq son illər daha da güclənib.

“Siz Avropa İttifaqına enerji təchizatını şaxələndirməkdə və enerji təhlükəsizliyimizi möhkəmləndirməkdə yardımçı oldunuz – bu, dünya miqyasında görünməmiş çağırışların yaşandığı dövrdə baş verdi,” –  Kallad vurğulayıb.

O, Azərbaycanın Ukraynaya göstərdiyi humanitar yardımı və 2024-cü ildə COP29 iqlim sammitinə ev sahibliyi etməsini də yüksək qiymətləndirib.

Avropa İttifaqı rəsmisi bildirib ki, bu əməkdaşlıq qarşılıqlı hörmətə, o cümlədən Aİ üzv dövlətlərinə, hüququn aliliyinə və insan hüquqlarına hörmət prinsiplərinə  əsaslanmalıdır . 

Kallad əlavə edib ki, Aİ hazırda Azərbaycanın ən böyük ticarət tərəfdaşı və ən iri sərmayəçisidir, həmçinin ölkədə mina təmizləmə prosesinə ən çox dəstək verən tərəflərdəndir.

“Bu gün prezident İlham Əliyevlə və xarici işlər naziri ilə ticarətin artırılması, Avropa İttifaqı, Cənubi Qafqaz və Mərkəzi Asiya arasında nəqliyyat əlaqələrinin inkişaf etdirilməsi imkanlarını müzakirə etdik,” – o bildirib.

Kallas həmçinin Ermənistan və Azərbaycan arasında sülh prosesini dəstəklədiyini vurğulayıb və qeyd edib ki, tərəflər sülh sazişi mətni üzrə razılıq əldə ediblər.

“Bu razılaşma tərəflər üçün uzunmüddətli və dayanıqlı sülhə nail olmaq imkanı yaradır. Avropa İttifaqı bu prosesi dəstəkləməyə davam edəcək,” – o əlavə edib.

N.Təbrizli