Avropa Şurası komissarının qərəzli bəyanatını rədd edirik - XİN

Azərbaycan Xarici İşlər Nazirliyi (XİN) Avropa Şurasının insan hüquqları üzrə komissarı Maykl O’Flahertinin Azərbaycanda aparılan istintaq tədbirləri və son məhkəmə qərarları ilə bağlı səsləndirdiyi əsassız, qərəzli və qəbuledilməz bəyanatını qətiyyətlə rədd edir. Bu barədə XİN-in mətbuat katibi Ayxan Hacızadə Reporta şərhində bildirib.

O qeyd edib ki, sözügedən bəyanat Azərbaycanın daxili işlərinə və məhkəmə proseslərinə müdaxilə məqsədi daşıyan növbəti uğursuz cəhddir:

"Azərbaycan Respublikasında insan hüquqları və əsas azadlıqları milli qanunvericilik və beynəlxalq öhdəliklərə uyğun olaraq tam təmin edilir və onlara hörmət olunur. Bu hüquq və azadlıqlar ölkədə müstəqil şəkildə fəaliyyət göstərən və qanunun aliliyini təmin edən məhkəmə orqanları tərəfindən qorunur".

O əlavə edib ki, Azərbaycanın suveren ərazisində qanunun aliliyinə təminat verilməsi heç bir şəxsə, o cümlədən peşə fəaliyyətinə görə, xüsusi imtiyaz vermir və bu şəxsləri ölkə qanunlarına əməl etmək öhdəliyindən azad etmir:

"Komissarın bəyanatında adı çəkilən şəxslərə qarşı irəli sürülmüş ittihamlar müvafiq qanunvericiliyin tələblərinə uyğun olaraq araşdırılıb, cinayət-prosessual məcəlləyə tam riayət edilib və həmin şəxslərin məhkəmə qarşısında bütün hüquqları təmin olunub".

XİN rəsmisi vurğulayıb ki, Avropa Şurasının insan hüquqları üzrə ali komissarı Azərbaycanın müstəqil məhkəmə orqanlarının fəaliyyətinə müdaxilə etmək və təzyiq göstərmək cəhdlərindən çəkinməli, bunun əvəzinə, bir sıra digər AŞ ölkələrində insan hüquqları sahəsində mövcud olan sistematik problemlərə diqqət yönəltməlidir:

"Biz komissarı Avropa Şurasına üzv ölkələrdə artmaqda olan islamofobiya, miqrantlara və sığınacaq axtaran şəxslərə qarşı ləyaqəti alçaldan rəftar, siyasi təqiblər, həbsxanalarda baş verən ölüm hallarının artması, eləcə də Avropa institutlarında yayılmış korrupsiya kimi ciddi problemlərə diqqət yetirməyə çağırırıq".