General rütbəsinə malik hərbi qulluqçular üçün yaş həddi aradan qaldırılır

General rütbəsinə malik hərbi qulluqçular üçün yaş həddinin aradan qaldırılması ilə bağlı qanun layihəsi Azərbaycanın hərbi potensialının və peşəkar kadr resurslarının qorunmasına yönəlib. Bu barədə Milli Məclisin deputatı Arzu Nağıyev bildirib.  

Deputat qeyd edib ki, sözügedən qanun layihəsi hərbi xidmət keçmə qaydalarını tənzimləyir və general rütbəsində olan şəxslərin yaş məhdudiyyəti olmadan xidmətlərini davam etdirməsinə hüquqi zəmin yaradır.

“Layihənin əsas məqsədi odur ki, yüksək rütbəli və təcrübəli hərbi qulluqçular xidmətlərini davam etdirə bilsinlər. Bu, həm hərbi sahədə sabitliyin, həm də kadr ehtiyatının qorunmasına töhfə verəcək,” — Arzu Nağıyev vurğulayıb.

O əlavə edib ki, qanun layihəsi birinci oxunuşda ətraflı şəkildə müzakirə olunub, ikinci oxunuşda isə Müdafiə və Təhlükəsizlik Komitəsində nəzərdən keçirilərək plenar iclasa tövsiyə edilib. 

Layihə Milli Məclisin plenar iclasında maddələr üzrə səsverməyə çıxarılıb və ikinci oxunuşda qəbul edilib.

N.Təbrizli