Deputat təklif edir ki, Naxçıvanın statusu ləğv olunsun - Deputatlar arasında fikir ayrılığı/VİDEO

Naxçıvan Muxtar Respublikasının ləğv olunması barəsində düşünmək lazımdır. . Bunu Milli Məclisin deputatı Qüdrət Həsənquliyev deyib. 

“Naxçıvan həmişə həyat səviyyəsi aşağı olub. Bunun səbəbi əkin sahələrinin az olması, digər səbəbi məmurların çoxluğu idi. Məmur təbəqəsi inkişafın qarşısında problem idi. İndi də yeni bir icra orqanı strukturu yaradırıq. Konstitusiyanın 135 maddəsinə görə Naxçıvanda icranı Nazirlər Kabineti həyata keçirir”, - deputat “Naxçıvan Muxtar Respublikasının Konstitusiyasında dəyişikliklərin təsdiq  edilməsi haqqında” Azərbaycan Respublikası Konstitusiya qanununun layihəsinə münasibət ildirərkən deyib. 

Həsənquliyev təklif edir ki, Naxçıvanda Muxtar Respublikasının saxlanılmasına ehtiyac yoxdur. 
“Muxtariyyətin ləğvi barəsində düşünmək lazımdır. Bu barədə ictimai müzakirələr açmaq olar. Bu həm idarəetmədə xərclərin azaldılması da deməkdir”, - deputat  bildirib. 

Spikerin müavini  Ziyafət Əsgərov deputata irad bildirərək vurğulayıb ki, Naxçıvanın statusu heç vaxt ləğv oluna bilməz. 

"Siz həmişə buradakı çıxışlarınızda bu təklifi vermisiniz. Başa düşürəm deputat dediyi söz görə məsuliyyət daşımır. Amma biraz diqqətli olmaq lazımdır. Naxçıvanın status alması Heydər Əliyevin tarixi uğuru olub. İndi bu statusu ləğv edib Naxçıvanı kimin ağuşuna verək. ", - Əsgərov deyib. 

Qüdrət Həsənquliyev də Əsgərova cavab olaraq bildirib ki, onun Parlamentdə qaldırdığı bütün təkliflər zamanla baş verib. O həmçinin bildirib ki, bu ictimai müzakirələr nəticəsində qərar veriləcək məsələdir. 

Gülnar Nazimqızı