Ceyhun Bayramov indoneziyalı həmkarı ilə görüşüb - Yenilənib

Azərbaycan xarici işlər naziri Ceyhun Bayramov indoneziyalı həmkarı Suqiono ilə görüşüb.Bu barədə Azərbaycan Xarici İşlər Nazirliyinin "X" hesabındakı paylaşımında deyilir.

Tərəflər İslam Əməkdaşlıq Təşkilatının Xarici İşlər Nazirləri Şurasının İstanbul şəhərində keçirilən 51-ci sessiyası çərçivəsində bir araya gəliblər.

Nazirlər İsrail və İran arasında mövcud eskalasiyanı müzakirə edib və narahatlıqlarını ifadə ediblər.İndoneziya tərəfi vətəndaşlarının İrandan təxliyəsinin asanlaşdırılmasına görə Azərbaycana minnətdarlığını bildirib.

Azərbaycan ilə İndoneziya arasında bir sıra sektorlar üzrə, xüsusilə də iqtisadiyyat, nəqliyyat və turizm sahələrində ikitərəfli əlaqələrin möhkəmləndirilməsinin əhəmiyyəti vurğulanıb.

BMT, İƏT, Qoşulmama Təşkilatı, D-8 və digər qlobal və regional təşkilatlar çərçivəsində əməkdaşlığın dərinləşdirilməsinin vacibliyi qeyd edilib.

Nazirlər, həmçinin qarşılıqlı maraq doğuran regional və beynəlxalq təhlükəsizlik məsələlərini müzakirə ediblər.

20:30

Azərbaycanın xarici işlər naziri Ceyhun Bayramov Suriyanın xarici işlər naziri Əsəd əl-Şeybani ilə görüşüb.Bu barədə Azərbaycan Xarici İşlər Nazirliyinin "X" hesabında paylaşım edilib.

Tərəflər İslam Əməkdaşlıq Təşkilatının Xarici İşlər Nazirləri Şurasının İstanbul şəhərində keçirilən 51-ci sessiyası çərçivəsində bir araya gəliblər.

Müzakirələr zamanı nazirlər həm ikitərəfli, həm də çoxtərəfli əməkdaşlığın genişləndirilməsi ilə bağlı hərtərəfli fikir mübadiləsi aparıb,humanitar yardım təşəbbüslərinin gücləndirilməsinə və münaqişədən sonra bərpa səylərində əməkdaşlıq imkanlarının araşdırılmasına xüsusi diqqət yetiriblər.

Suriyaya qarşı tətbiq edilən birtərəfli sanksiyaların aradan qaldırılmasının ölkənin yenidən qurulması və uzunmüddətli inkişafının asanlaşdırılmasında mühüm rol oynayacağı vurğulanıb.

Nazirlər, həmçinin Yaxın Şərqdə baş verən hadisələrə, İsrail və İran arasında son eskalasiyaya diqqət yetirməklə, regional və beynəlxalq təhlükəsizlik məsələlərinə toxunublar.