İsrailin İrana hücumu pislənməlidir, Qəzzada baş verənlər insanlıq faciəsidir - Şahbaz Şərif

Pakistan Prezidenti Şərif İqtisadi Əməkdaşlıq Təşkilatının (İƏT) 17-ci Zirvə görüşündə çıxış edərək iqlim dəyişiklikləri, regional qeyri-sabitlik və humanitar böhranlara toxunub.

O, İsrailin İrana və Qəzzaya qarşı hərbi əməliyyatlarını qətiyyətlə pisləyib və Kəşmirdəki son insidentlərlə bağlı Hindistanı məsuliyyətli davranmağa çağırıb.

“2022-ci ildə dağıdıcı daşqınlarla qarşılaşdıq. Bu, insanların qazanc imkanlarını məhv etdi. Ötən həftə bəzi ölkələrdə təbii fəlakətlər insan tələfatına səbəb oldu. Pakistan olaraq biz bərpa və davamlı müqavimətə əsaslanan dörd sütunlu model təqdim edirik,” –  prezident bildirib.

O, aşağı emissiyalı dəhlizlərin yaradılmasının və ekoturizmin inkişaf etdirilməsinin vacibliyini vurğulayıb. “Bu platformalarda dayanıqlı sistemlər və yaşıl dəhlizlər müzakirə edilməlidir.”

Prezident, həmçinin bildirib ki, hazırda regionda qeyri-sabitlik hökm sürür və bu, İƏT məkanında təhlükəsizliyi pozur.

“İsrailin İrana qarşı hücumlarını və qardaş ölkəyə təcavüzünü qətiyyətlə pisləyirik. Yaralananlara şəfa diləyir və İrana başsağlığı veririk.”

Kəşmirdəki gərginliyə toxunan dövlət başçısı Hindistanın su resurslarına dair sazişi pozduğunu və 240 milyon pakistanlının suya çıxışını əngəllədiyini bildirib. “Heç kim bu barbarlığa göz yummamalıdır,” –  o qeyd edib.

O, Qəzzada aclığın geniş vüsət aldığını və hətta BMT-nin belə hücuma məruz qaldığını bildirib.

Prezident Pakistanın barbarlığa, xüsusilə Kəşmir və Qəzzada törədilən zorakılıqlara qarşı çıxdığını vurğulayıb. O, İƏT-ə üzv dövlətlərin dəstəyinə təşəkkür edib və bildirib ki, 2027-ci ildə Pakistanın Ləhor şəhəri İƏT-in mədəniyyət paytaxtı seçilib və öhdəliklər yerinə yetiriləcək.

N.Təbrizli