Yaşıl enerji və nəqliyyat dəhlizləri regional əməkdaşlıq üçün əsasdır -Tacikistan Prezidenti

Tacikistan Prezidenti Emoməli Rəhmon İqtisadi Əməkdaşlıq Təşkilatının (İƏT) Zirvə görüşündə çıxışı zamanı nəqliyyat əlaqələrinin inkişafı, yaşıl enerji və ekoloji dayanıqlığın önəmini vurğulayıb.

“Cənub-Şimal və Qərb-Şərq nəqliyyat dəhlizlərinin birləşdirilməsi üzərində birgə işləməliyik. Multimodal nəqliyyat, sənədlərin rəqəmsallaşdırılması və nəqliyyat maneələrinin aradan qaldırılması beynəlxalq yükdaşımalarda mühüm rol oynayır,” –  Rəhmon bildirib.

Prezident həmçinin KASA-1000 yüksək gərginlikli enerji xəttinin tikintisini və Xucənd–Qatqa dəmir yolu marşrutunun işə düşməsini strateji addım kimi qiymətləndirib. Tacikistan “Ekorem” layihəsində iştirakda maraqlı olduğunu bəyan edib.

“Ölkəmizin enerji ehtiyaclarının 98 faizi bərpa olunan enerji mənbələrindən ödənilir. Bu, regionda yaşıl iqtisadiyyatın inkişafına töhfə verə bilər,” –  dövlət başçısı vurğulayıb.

Rəhmon kənd təsərrüfatında yeni texnologiyaların və klasterlərin tətbiqini, məhsulların logistik daşınma imkanlarının yaradılmasını prioritet sahə adlandırıb.

O, həmçinin dağlıq ölkələrdə təbii fəlakətlər – sel, daşqın və sürüşmələrin iqtisadi təsirlərinə toxunaraq bu risklərin azaldılması üçün İƏT çərçivəsində tədbirlər görülməsinin vacibliyini qeyd edib.

Tacik lider buzlaqların qorunması və içməli su ehtiyatlarının mühafizəsini regional təhlükəsizlik məsələsi adlandırıb. Rəhmon çıxışında həmçinin İranda gedən müharibəni pisləyib və Yaxın Şərqdə davamlı sülhün qurulmasına çağırış edib. 

N.Təbrizli