Təmiz enerji, sıfır tullantı və 100 milyardlıq investisiya ilə İƏT daha güclü olacaq - Ərdoğan

 Türkiyədə qəbul edilən yeni iqlim qanunu və “Sıfır tullantı” layihəsi İqtisadi Əməkdaşlıq Təşkilatı (İƏT) çərçivəsində iqlimlə mübarizə səylərinə əlavə güc verir. Bu barədə Ərdoğan İƏT-in Xankəndidə keçirilən 17-ci Zirvə Görüşündə çıxışı zamanı deyib.

“Bu münasibətlə qeyd etmək istəyirəm ki, Azərbaycanda qurulacaq təmiz enerji mərkəzləri artıq son mərhələdədir. İƏT-in əsas hədəfi iqtisadi və ticarət əməkdaşlığıdır. Bu çərçivədə 100 milyard dollarlıq investisiya həddini artırmalıyıq,” –  Türkiyə lideri vurğulayıb.

Ərdoğan, təşkilatın 2030-cu ilə qədər strateji məqsədlərinin reallaşdırılması üçün üzv dövlətlərin uzunmüddətli və səmərəli əməkdaşlıq qurmalı olduqlarını bildirib. O, həmçinin İƏT-in strukturuna daxil olan qurumlarda da islahatların aparılmasının vacibliyini qeyd edib.

Türkiyə Prezidenti çıxışında Yaxın Şərqdəki vəziyyətə də toxunub. “İsrailin mövcud rəhbərliyi altında həyata keçirdiyi siyasət bölgəmizin sülh və sabitliyini təhdid edir.

Qəzzada baş verən məzalimin bir dəqiqə belə davam etməməsi üçün hamımız daha çox çalışmalıyıq,” – d Ərdoğan bildirib.

O, İsrailin Suriya və İrana hücumları ilə yanaşı, Fələstin xalqını diz çökdürməyə çalışdığını, bunun isə bölgəni qan gölünə çevirə biləcəyini qeyd edib.

“Biz Netanyahunun bölgəmizi məhv etməsinə səssiz qala bilmərik",  -  /rdoğan bildirib.

Ərdoğan, Suriyada xalqın uzun illər apardığı mübarizənin nəticəsində yaranan yeni situasiyanı “ümid işığı” kimi qiymətləndirib və Əfqanıstanda xalqın dirçəlməsinə inandıqlarını bildirib.

O, son dövrlərdə baş vermiş hücumlarla bağlı Pakistan xalqına başsağlığı verib.

Türkiyə Prezidenti çıxışında həmçinin Kipr türklərinə dəstəyini bir daha ifadə edib və İƏT üzv dövlətlərini bu istiqamətdə əlaqələri gücləndirməyə çağırıb.

N.Təbrizli