"Yaşayış minimumu haqqında" qanunun tətbiqinə dair fərman imzalayıb

 Prezident İlham Əliyev “Yaşayış minimumu haqqında” qanunda dəyişikliklərin tətbiqinə dair 21 iyun 2025-ci il tarixli qanunun icrası və 2004-cü ildən qüvvədə olan əvvəlki fərmanda dəyişiklik edilməsi barədə yeni fərman imzalayıb.

Yeni fərmana əsasən, qanunda nəzərdə tutulmuş müvafiq icra hakimiyyəti orqanının səlahiyyətlərini birbaşa dövlət başçısı həyata keçirəcək.

Səlahiyyətli orqanlar kimi isə Nazirlər Kabineti və Əmək və Əhalinin Sosial Müdafiəsi Nazirliyi nəzdindəki Dayanıqlı və Operativ Sosial Təminat Agentliyi (DOST) çıxış edəcək.

Nazirlər Kabinetinə tapşırılıb ki, qanunun 3.3-cü maddəsinə uyğun olaraq, tibb, təhsil və sosial müəssisələrdə şəxslər üçün qida normalarını üç ay müddətində müəyyənləşdirsin və bu barədə Prezidentə məlumat versin. Hökumət eyni zamanda qanundan irəli gələn digər texniki və inzibati məsələləri də həll etməlidir.

Qanun və ona edilən dəyişikliklər yaşayış minimumunun tənzimlənməsi və sosial təminat siyasətinin təkmilləşdirilməsinə yönəlib.