Deputat ölüm kağızı və dəfn pulu prosedurlarının sadələşdirilməsini təklif edir

Milli Məclisin deputatı Razi Nurullayev ölüm haqqında şəhadətnamənin verilməsi və dəfn pulu ilə bağlı prosedurların sadələşdirilməsinə çağırıb. Bu barədə deputat Milli Məclisdə çıxışı zamanı deyib. 

Deputat bildirib ki, bu sahədəki mövcud qanun və tələblər regionlarda, xüsusilə İmişlidə vətəndaşlar üçün ciddi çətinliklər yaradır.

"Yaxınını itirən ailələr 7-10 gün ərzində yas işləri ilə məşğul olur, bu müddətdə hüquqi prosedurları yerinə yetirməkdə çətinlik çəkirlər. Təcili yardım çağırılmayan və ya xəstəxanada qeydiyyatda olmayan şəxslər üçün ölüm kağızı verilmir. Dəfn pulu üçün müəyyən olunmuş qısa müddətdə müraciət etməyənlər isə bu hüquqdan məhrum edilir və məsələ məhkəməyə yönləndirilir," – deputat bildirib.

Onun sözlərinə görə, vətəndaşların məhkəməyə müraciət etməsi əlavə xərc tələb edir – yalnız dövlət rüsumu 101 manat təşkil edir. Məhkəmələr isə çox vaxt vətəndaşları yenidən yerli icra nümayəndələrinə yönləndirir.

"Əgər məhkəmə qərarını icra nümayəndəsinin arayışına əsasən çıxarırsa, o zaman bu hüquq niyə birbaşa həmin nümayəndədən alınıb? Bu, məntiqli sualdır," –  Nurullayev vurğulayıb.

Deputat ölüm kağızı və dəfn xərclərinin rəsmiləşdirilməsi ilə bağlı prosedurların qanunvericilikdə sadələşdirilməsini təklif edib.

Gülnar Nazimqızı