7 aydır AZAL təyyarəsinin vurulması ilə bağlı Rusiyadan cavab ala bilmirik - Prezident

Azərbaycan Hava Yollarına (AZAL) məxsus təyyarənin vurulması ilə bağlı Rusiyadan hələ də rəsmi cavab alınmayıb və rəsmi Bakı məsələ ilə bağlı beynəlxalq hüquq mexanizmlərinə müraciət etməyi planlaşdırır.Bunu Azərbaycan Prezidenti İlham Əliyev III Şuşa Qlobal Media Forumunda Reuters agentliyinin sualını cavablayarkən deyib.

“Hadisənin üzərindən yeddi ay keçməsinə baxmayaraq, bizə hər hansı cavab verilməyib. Biz baş verənləri bilirik. Rusiya da nə baş verdiyini yaxşı bilir,” –  Əliyev deyib.

Hadisə zamanı AZAL-a məxsus təyyarənin Rusiya hava məkanında iki dəfə hücuma məruz qaldığını deyən Prezident, bəzi iddiaların – xüsusilə də təyyarənin Ukrayna pilotsuz uçuş aparatı ilə toqquşması versiyasının – “gülünc və reallıqdan uzaq” olduğunu vurğulayıb.

“Rusiya hava məkanı hadisədən sonra bağlanıb. Hadisə baş verən zaman hava məkanı açıq idi,” – Əliyev qeyd edib.

Prezident əlavə edib ki, Azərbaycan bu məsələ ilə bağlı üç əsas tələb irəli sürür: faktın etirafı, məsul şəxslərin cəzalandırılması və təzminatın ödənilməsi.

“Bu cür davranış qeyri-məhsuldardır. Əgər yaxın müddətdə aydın cavab verilməzsə, biz beynəlxalq ədalət məhkəmələrinə müraciət edəcəyik",– deyə o vurğulayıb.

Gülnar Nazimqızı