Kiçik bizneslərin də infrastrukturu böyük şirkətlərə təsir göstərə bilər - Davud Rüstəmov

Azərbaycanda rəqəmsallaşma və ağıllı şəhərlərin inkişafı istiqamətində atılan addımlar yeni imkanlarla yanaşı, təhlükəsizlik baxımından da ciddi çağırışlar yaradır. Bunu Dövlət Təhlükəsizlik Xidmətinin (DTX) Kibertəhlükəsizlik Mərkəzinin rəisi Davud Rüstəmov müsahibəsində bildirib.

Onun sözlərinə görə, bu gün kibertəhlükəsizlik yalnız iri şirkətlərin deyil, bütün iqtisadi subyektlərin diqqət mərkəzində olmalıdır.

“Burada çox vacib məqamlar səsləndirildi. Hətta kiçik və orta sahibkarlıq subyektlərinin belə infrastrukturları böyük bizneslərin infrastrukturuna təsir göstərə bilir. Qeyd etmək lazımdır ki, Avropa İttifaqında tətbiq olunan NIS 2 direktivi artıq kiçik və orta sahibkarlıq subyektlərini də kritik infrastruktur siyahısına daxil edir. Azərbaycanda isə hələlik yalnız iri özəl sektor subyektləri bu kateqoriyaya daxildir”, -  Rüstəmov bildirib.

Onun sözlərinə görə,  kibertəhdidlərdən heç kim tam sığortalanmayıb.

“Kiberhücumlar kiçik və orta bizneslərə yönəlsə belə, onların təsiri böyük şirkətlərin sistemlərinə də sirayət edə bilər. Buna heç kim tam zəmanət verə bilməz”,  - o vurğulayıb.

DTX rəsmisi qeyd edib ki, Azərbaycanın beynəlxalq sistemə inteqrasiyası və rəqəmsallaşmanın dərinləşməsi ilə kibertəhlükəsizlik məsələlərinin əhəmiyyəti daha da artır:

“Ağıllı şəhərlərin inkişafı istiqamətində ölkəmizdə böyük investisiyalar və siyasi qərarlar mövcuddur. Azərbaycanın beynəlxalq sistemə inteqrasiyası sürətlə gedir və bu, qürurverici haldır, lakin eyni zamanda yeni çağırışlar da yaradır. Rəqəmsallaşma dərinləşdikcə, təhlükəsizlik məsələləri daha da ön plana çıxır”,  -  DTX rəsmisi bildirib.

O vurğulayıb ki, bu sahədə effektiv nəticələr əldə etmək üçün dövlət və özəl sektorun koordinasiyalı fəaliyyəti vacibdir:

“Milli kibertəhlükəsizlik strategiyası hazırlanır, biznes subyektləri üçün təlim və maarifləndirmə proqramları həyata keçirilir. Lakin real effektivlik üçün bütün maraqlı tərəflərin birlikdə çalışması vacibdir”,  - Rüstəmov vurğulayıb.

Davud Rüstəmov yekunda bildirib ki, kibertəhlükəsizlik artıq təkcə texniki məsələ deyil, milli təhlükəsizlik və iqtisadi sabitlik məsələsidir:

“Azərbaycanın ağıllı şəhərlər, yaşıl enerji və rəqəmsal iqtisadiyyat kimi strateji prioritetləri yalnız təhlükəsiz rəqəmsal infrastruktur üzərində dayanıqlı ola bilər”, - o bildirib.

Gülnar Nazimqızı