İlham Əliyev və Vladimir Putin Düşənbədə danışıqlar aparıblar

Düşənbədə Azərbaycan Prezidenti İlham Əliyevlə Rusiya Prezidenti Vladimir Putin arasında görüş keçirilib.

Rusiya mətbuatının məlumatına görə, Vladimir Putin görüşə Azərbaycan Hava Yollarına (AZAL) məxsus təyyarənin qəzaya uğraması ilə bağlı vəziyyətin müzakirəsindən başlamağı təklif edib.

Rusiya Prezidenti bildirib ki, baş verən faciə ilə əlaqədar bir daha dərin hüznlə başsağlığı verir və hadisənin Rusiya hava məkanında baş verməsinə görə üzr istəyir.

Putinin sözlərinə görə, Rusiya təhqiqatla bağlı bütün razılaşdırılmış dəstəyi göstərir.

“AZAL təyyarəsinin qəzaya uğramasının səbəbləri, o cümlədən hadisə zamanı Rusiya hava məkanında Ukraynaya məxsus pilotsuz uçuş aparatının olması ilə bağlıdır,” –  Rusiya Prezidenti bildirib.

O qeyd edib ki, “hadisə günü Rusiya hava məkanına üç Ukrayna PUA-sı daxil olub. Rusiya HHM sistemindən buraxılan iki raket təyyarəyə birbaşa dəyməyib, bir neçə metr məsafədə partlayıb. Təyyarə çox güman ki, raket parçaları ilə zədələnib.”

Daha əvvəl – saat 15:23-də – Azərbaycan və Rusiya prezidentlərinin Düşənbədəki “Kohi Somon” hökumət iqamətgahında görüş keçirdiyi bildirilmişdi.

Prezident İlham Əliyev Tacikistan Prezidenti Emoməli Rəhmonun dəvəti ilə MDB Dövlət Başçıları Şurasının iclasında iştirak etmək üçün oktyabrın 9-da Düşənbəyə səfər edib.

Düşənbə beynəlxalq hava limanında dövlət başçısını Tacikistan Milli Məclisinin sədri Rüstəm Emoməli və digər rəsmi şəxslər qarşılayıblar.