"Space TV"də qohum evliliyi ilə bağlı görüntülərə görə xəbərdarlıq edilib

Azərbaycan Respublikası Audiovizual Şurası "Space TV" telekanalına xəbərdarlıq edib. Səbəb kimi, oktyabrın 8-də yayımlanan "Banu" proqramında qohumlar arasında bağlanmış nikaha dair toy görüntülərinin efirə verilməsi göstərilib.

Şuradan  verilən məlumata görə, yayımlanan süjetdə nümayiş etdirilən toy şənliyi qanunvericiliyin son dəyişiklikləri fonunda uyğun hesab olunmayıb. 2025-ci il iyulun 1-dən qüvvəyə minmiş dəyişikliklərə əsasən, Azərbaycan Respublikasının Ailə Məcəlləsinin 12.0.2-1-ci maddəsi ilə qardaşların və/və ya bacıların ümumi bioloji nənə və ya babası olan övladları arasında nikah bağlanması qadağan edilib.

Audiovizual Şura müəyyən edib ki, süjetdə göstərilən toy mərasimi 2025-ci il martın 6-da rəsmiləşdirilmiş nikah əsasında keçirilib və lentə bir neçə ay əvvəl alınsa da, texniki səbəbdən 8 oktyabr 2025-ci il tarixində efirə verilib.

Monitorinq nəticəsində qanunvericiliyin pozulması halı qeydə alınsa da, kanal tərəfindən pozuntunun etiraf olunması və məsul əməkdaşla bağlı tədbirlərin görüldüyü nəzərə alınaraq "Space TV"yə xəbərdarlıqla kifayətlənmək qərarı verilib.