Əliyev: kibertəhlükəsizlik milli təhlükəsizlik məsələsidir

Son on ildə süni intellekt (Sİ) sahəsində dəyişikliklər sürətlənib və indi bu texnologiya ölkələrin gələcək inkişafının ayrılmaz hissəsinə çevrilib. Bu sözləri Prezident İlham Əliyev Azərbaycan Milli Elmlər Akademiyasının 80 illik yubiley yığıncağında çıxışı zamanı söyləyib. 

O vurğulayıb ki, Azərbaycan bu sahədə lazımi addımları atır.

“On il bundan əvvəl bu barədə heç kim danışmırdı. Bu gün artıq bu, ölkələrin gələcək inkişafının ayrılmaz hissəsidir. Biz burada geri qalmamalıyıq,” —  dövlət başçısı bildirib və Azərbaycan alimlərini Sİ-nin inkişafında fəal iştiraka dəvət edib.

Prezident həmçinin rəqəmsallaşma sahəsində əldə edilmiş uğurları xatırladıb, hökumətin strukturunda “Rəqəmsal İnkişaf və Nəqliyyat Nazirliyi” adının verilməsini misal gətirib və rəqəmsal xidmətlərin tətbiqi sayəsində işin keyfiyyətinin və səmərəliliyinin artdığını qeyd edib.

Kibertəhlükəsizliklə bağlı çıxışında Əliyev deyib ki, bu il ölkə kiberhücumlara məruz qalıb və buna cavab olaraq Kibertəhlükəsizlik Mərkəzinin yaradılması vaxtında atılmış addım olub.

“Kibertəhlükəsizlik … virtual təhlükəsizlik deyil. Bu, hər bir ölkənin fiziki təhlükəsizliyidir,” — o bildirib və beynəlxalq tərəfdaşlarla, bu sahədə təcrübəli şirkətlərlə geniş proqramlar üzərində işlədiklərini əlavə edib.

Prezident vurğulayıb ki, həm müdafiə, həm də zərərverənlərə layiqli cavab verilməsi vacibdir.

 “Biz həm özümüzü müdafiə etməliyik, həm də bizə zərər vermək istəyənlərə layiqli cavab verməliyik", - o bildirib. 

Gülnar