Kəmaləddin Heydərov İsrailin yeni səfiri ilə görüşüb

Azərbaycan Respublikasının fövqəladə hallar naziri, general-polkovnik Kəmaləddin Heydərov İsrail Dövlətinin Azərbaycandakı fövqəladə və səlahiyyətli səfiri Ronen Kraus ilə görüşüb. Bu barədə nazirliyin mətbuat xidməti məlumat yayıb.

Nazir Kəmaləddin Heydərov səfir Ronen Krausu səmimi salamlayaraq onu Azərbaycanda fövqəladə və səlahiyyətli səfir təyin olunması münasibətilə təbrik edib və fəaliyyətində uğurlar arzulayıb.

Nazir qeyd edib ki, Azərbaycan və İsrail arasında qarşılıqlı hörmətə və dostluğa əsaslanan münasibətlər daim genişlənir və bu kontekstdə hər iki ölkənin müvafiq qurumları arasında fövqəladə hallarla mübarizə sahəsində səmərəli əməkdaşlıq uğurla davam edir.

Kəmaləddin Heydərov Azərbaycanda fövqəladə halların qarşısının alınması və nəticələrinin aradan qaldırılması istiqamətində görülən işlər barədə səfirə ətraflı məlumat verərək qeyd edib ki, bu sahədə əlaqələrin daha da inkişafı üçün geniş potensial mövcuddur.

Səmimi qəbula və təbriklərə görə təşəkkürünü bildirən səfir Ronen Kraus, iki ölkə arasında münasibətlərin yüksək səviyyəsindən və fövqəladə hallar sahəsində əməkdaşlıqdan məmnunluğunu ifadə edib.

Səfir həmçinin fövqəladə hallar üzrə qurumlar arasında əlaqələrin genişləndirildiyini vurğulayaraq, bu istiqamətdə səylərini artıracağını bildirib. Görüşdə qarşılıqlı maraq doğuran məsələlər ətrafında geniş fikir mübadiləsi aparılıb.