“İskəndər” raketinin qəlpələri Azərbaycanın Kiyevdəki səfirliyinə düşüb

Rusiyanın ötən gecə Kiyevə endirdiyi raket hücumu zamanı “İskəndər” raketinin qəlpələri Azərbaycanın Ukraynadakı səfirliyinin binasına düşüb. Bü barədə Ukrayna Prezidenti Vladimir Zelenski bildirib.

Prezident sosial şəbəkə “X”də yazıb ki, hücum nəticəsində uşaqlar və hamilə qadın olmaqla onlarla insan yaralanıb, dörd nəfər isə həlak olub.

Zelenskinin sözlərinə görə, hücum zamanı Rusiyanın təxminən 430 dron və 18 raket, o cümlədən ballistik və aero-ballistik raketlərdən istifadə etdiyi ehtimal olunur.

“Bu, insanlara və mülki infrastruktura maksimum ziyan vurmağa hesablanmış məqsədli hücum idi. Təkcə Kiyevdə onlarla yaşayış binası zədələnib. Azərbaycanın səfirliyi ‘İskəndər’ raketinin qəlpələri ilə zədələnib”, – o qeyd edib.

Zelenski bildirib ki, hücumun əsas hədəfi Kiyev olub, zərbələr həmçinin Kiyev, Xarkov və Odessa vilayətlərinə də endirilib.

Prezident əlavə edib ki, bu səhər Sumı vilayətində Rusiya “Zirkon” raketindən istifadə edib.

Zelenski daxili işlər naziri İqor Klimenkonun və Hərbi Hava Qüvvələrinin komandanı Anatoliy Krivonoşkonun xilasetmə işləri və hava hücumundan müdafiə üzrə hesabat verdiyini bildirib.

N.Təbrizli